Famous Players Never Played IPL: ఐపీఎల్.. దాదాపు 2-3 నెలలపాటు సాగే ఈ టోర్నీ అంటే క్రికెట్ అభిమానులకు పండగే. చెలరేగిపోయే బ్యాటర్లు.. వికెట్ల వేటలో బౌలర్లు.. ఫీల్డర్ల అద్భుత విన్యాసాలు.. ప్రేక్షకుల్ని మంత్రముగ్ధుల్ని చేస్తాయి. ఇలాంటి లీగ్లో ఆడాలని, అద్భుత ప్రదర్శనతో కోట్లు కొల్లగొట్టాలని ప్రతీ క్రికెటర్ కలలుగంటాడు. ఈ టోర్నీ 2008లో మొదలైనా.. భారత క్రికెట్ దిగ్గజం సచిన్ తెందుల్కర్ సహా రాహుల్ ద్రవిడ్, కుంబ్లే, లక్ష్మణ్, గంగూలీ వంటి మాజీలు వారు రిటైరైన తర్వాత కూడా ఐపీఎల్ ఆడారు. విదేశీయుల్లో రికీ పాంటింగ్, సైమండ్స్, గిబ్స్, ఆమ్లా, జయసూర్య, జయవర్ధనే ఇలా ఎందరో ఇండియన్ ప్రీమియర్ లీగ్లో అలరించారు. అయితే.. ఒకప్పుడు ఆయా దేశాల తరఫున అద్భుత ప్రదర్శన చేసిన పలువురు స్టార్ ఆటగాళ్లు ఐపీఎల్లో ఒక్కసారి కూడా ఆడలేకపోయారు. వారెవరో ఓసారి చూద్దాం.
1. జో రూట్
ప్రస్తుతం ప్రపంచ క్రికెట్లో అద్భుతంగా రాణిస్తున్న ఆటగాళ్లలో జో రూట్ ముందువరుసలో ఉంటాడు. టెస్టుల్లో 4, వన్డేల్లో 11వ స్థానంలో కొనసాగుతున్నాడు. కానీ.. ఇంగ్లాండ్ సారథి ఐపీఎల్కు ఒక్కసారి కూడా ఆడలేకపోయాడు. టెస్టులు, వన్డేల్లో వేలకొద్దీ పరుగులు చేసిన రూట్.. 32 టీ20ల్లో 35 సగటుతో 893 రన్స్ మాత్రమే చేశాడు. స్ట్రైక్ రేటు 126గానే ఉంది. అత్యధిక స్కోరు 90. అయితే గతంలో ఐపీఎల్కు ఆడాలని రూట్ పలుమార్లు అనుకున్నా.. నిరాశే ఎదురైంది. కొన్ని సార్లు అతడిపై ఫ్రాంఛైజీలు ఆసక్తి చూపకపోడవం, మరికొన్నిసార్లు ఇంగ్లాండ్ బోర్డు ఒప్పుకోకపోవడం వల్ల అతడికి నిరాశ ఎదురైంది. అయితే.. టీ20ల్లో రూట్ దూకుడుగా ఆడలేడని క్రికెట్ విమర్శకుల అభిప్రాయం. మరి తన కెరీర్ ముగిసేలోపు ఐపీఎల్ అరంగేట్రం చేస్తాడో చూడాలి.
2. దినేష్ రామ్దిన్
వెస్టిండీస్ తరఫున 74 టెస్టులు, 139 వన్డేలు, 71 టీ-20లు ఆడిన ఘనత దినేశ్ రామ్దిన్ది. 3 ఫార్మాట్లలో బాగా రాణించలేకపోయినా.. సుదీర్ఘకాలం విండీస్కు ఆడాడు ఈ వికెట్కీపర్ బ్యాటర్. దాదాపు 6 వేలకుపైగా పరుగులు చేసిన ఈ విండీస్ ఆటగాడు.. ఐపీఎల్కు ప్రాతినిధ్యం వహించలేకపోయాడు. 2012,2016లో విండీస్ టీ-20 ప్రపంచకప్ గెలిచిన జట్టులో రామ్దిన్ సభ్యుడు కూడా. ఐపీఎల్ ఆడకపోయినా.. ఇతడు కరేబియన్ ప్రీమియర్ లీగ్లో రాణించాడు. విండీస్ ఆటగాళ్లు ఎందరో ఐపీఎల్లో రాణిస్తున్న నేపథ్యంలో రామ్దిన్ లాంటి ఆటగాడికి అసలు అవకాశం రాకపోవడం ఆశ్చర్యమే అని చెప్పొచ్చు.
3. స్టువర్ట్ బ్రాడ్
స్టువర్ట్ బ్రాడ్.. ఇంగ్లాండ్ టాప్ ఆటగాడు. వయసు మీద పడుతున్నా.. వికెట్ల వేటలో దూసుకెళ్తున్నాడు. 152 టెస్టులాడిన బ్రాడ్.. 537 వికెట్లు తీశాడు. వన్డేల్లో 178, టీ20ల్లో 65 వికెట్లతో రాణించాడు. 2011, 2012 ఐపీఎల్లో పంజాబ్ కింగ్స్ ఇతడిని తీసుకున్నప్పటికీ.. గాయం కారణంగా లీగ్లో పాల్గొనలేకపోయాడు. ఆ తర్వాత అసలు అతడిపై ఏ ఫ్రాంఛైజీ దృష్టిసారించలేదు.
4. వెర్నోన్ ఫిలాండర్
సౌతాఫ్రికా తరఫున కొద్దికాలమే ఆడినా.. ఈ బౌలర్ అద్భుతంగా రాణించాడు. అనతికాలంలోనే నెం.1 టెస్టు బౌలర్గా ఎదిగాడు. 64 టెస్టుల్లోనే 224 వికెట్లు తీశాడు. వన్డేలు, టీ-20ల్లోనూ వికెట్ల పండగ చేసుకున్నాడు. అయితే.. ఇతడికి ఐపీఎల్లో ఆడే అవకాశం రాలేదు.
భారత్లో వర్దమాన క్రికెటర్లు.. జాతీయ జట్టులోకి రావాలంటే ఐపీఎల్ ఒక మంచి అవకాశంగా భావిస్తారు. హార్దిక్ పాండ్య, సూర్యకుమార్ యాదవ్, ఇషాన్ కిషన్, బుమ్రా, వాషింగ్టన్ సుందర్, అక్షర్ పటేల్, రిషభ్ పంత్, పృథ్వీ షా, శుభ్మన్ గిల్, రుతురాజ్ గైక్వాడ్, వెంకటేశ్ అయ్యర్, దీపక్ చాహర్, శార్దుల్ ఠాకుర్, రాహుల్ చాహర్ ఇలా చెప్పుకుంటూ పోతే జాబితా చాలా పెద్దదే. వీరంతా ఐపీఎల్లో అద్భుత ప్రదర్శనతో టీమ్ఇండియాలో చోటు సంపాదించారు. ప్రస్తుత ఐపీఎల్లోనూ ఆయుష్ బదోనీ, అభినవ్ మనోహర్, జితేశ్ శర్మ, వైభవ్ అరోరా వంటి కుర్రాళ్లు రాణిస్తున్నారు.
ఇవీ చూడండి: ఈ ఫైటర్ పంచ్లే కాదు.. పరువాలూ అదుర్స్
'సచిన్ను ఎవరు ఔట్ చేయమన్నారు.. వాళ్లు నిన్ను చంపేస్తారు: గంగూలీ'
