ఐపీఎల్ 2022 కోసం అభిమానులు ఆత్రుతగా ఎదురుచూస్తున్నారు. ఈసారి మరో రెండు కొత్త జట్లు వచ్చి చేరుతుండటం వల్ల ఈ లీగ్పై మరింత ఆసక్తి నెలకొంది. అయితే ఈ టోర్నీ ఎప్పుడు మొదలవుతుందనే దానిపై ఇప్పటివరకు స్పష్టత లేదు. కాగా ఓ బీసీసీఐ అధికారి తెలిపిన వివరాల ప్రకారం మార్చి 27 లేదా ఏప్రిల్ 2న ఈ లీగ్ ప్రారంభమవుతుందని తెలుస్తోంది. దీనిపై బోర్డు త్వరలోనే స్పష్టత ఇవ్వనుందట.
ఒకే వేదికలో..
కరోనా కారణంగా గతేడాది యూఏఈలో లీగ్ నిర్వహించారు. కాగా.. ఈసారి మాత్రం ఎట్టి పరిస్థితుల్లోనూ భారత్లోనే టోర్నీ నిర్వహిస్తామని బీసీసీఐ అధ్యక్షుడు గంగూలీ స్పష్టం చేశారు. దీనిపైనే ప్రస్తుతం చర్చలు జరుపుతోంది బోర్డు. ముంబయిలోని వాంఖడేతో పాటు డీవై పాటిల్ స్టేడియంలో పూర్తి లీగ్ను నిర్వహించాలని చూస్తోంది. ఒకవేళ రెండు మైదానాలు సరిపోకపోతే పుణె స్టేడియంలో మరికొన్ని మ్యాచ్లను జరపాలని బోర్డు భావిస్తున్నట్లు ఓ అధికారి తెలియజేశారు.
రేసులో యూఏఈ, దక్షిణాఫ్రికా
ఒకవేళ భారత్లో కరోనా పరిస్థితి మరింత దిగజారితే లీగ్ను యూఏఈలో లేదా దక్షిణాఫ్రికాలో నిర్వహించాలని బోర్డు భావిస్తున్నట్లు సమాచారం. శ్రీలంక పేరు మాత్రం ఇప్పటివరకైతే చర్చకు రాలేదని తెలుస్తోంది.
ఈ సీజన్కు సంబంధించిన మెగావేలం ఫిబ్రవరి 12, 13న జరగనుంది. ఇప్పటికే ఇందుకు సంబంధించిన రిజిస్ట్రేషన్ వివరాలను ప్రకటించింది బీసీసీఐ. మొత్తం 1,214 మంది క్రికెటర్లు ఈసారి వేలంలో భాగం కానున్నారు.
