IPL News: ఈ ఏడాది ఐపీఎల్ సీజన్లో కొంత మంది ఆటగాళ్లు అంచనాలకు మించి రాణించారు. మరికొంతమంది ఫేమస్ ప్లేయర్లు మాత్రం పేలవ ప్రదర్శనతో ఏమాత్రం ఆకట్టుకోలేకపోయారు. సత్తా చాటితేనే ఐపీఎల్లో మనుగడ ఉంటుంది. భారంగా మారితే ఎంతటి ఆటగాళ్లనైనా వదులుకునేందుకు ప్రాంఛైజీలు ఏ మాత్రం వెనుకాడవు. ఈ సీజన్లో కొంతమంది ప్లేయర్లు రిజర్వ్ బెంచ్కే పరిమితమయ్యారు. వాళ్లకు అవకాశం కూడా దక్కలేదు. ఈ జాబితాలో ముఖ్యంగా విదేశీ ఆటగాళ్లున్నారు. వీరి భవిష్యత్ ప్రశ్నార్థకంగా మారింది. వచ్చే సీజన్కు వీరు జట్టులో ఉండటం అనుమానమే. అలాగే ఫేలవ ప్రదర్శన చేసిన ఆటగాళ్లను కూడా ఫ్రాంచైజీలు వదులుకునే అవకాశముంది. అలాంటి ఆటగాళ్లలో టాప్-5లో ఎవరున్నారో ఇప్పుడు చూద్దాం.
బెన్నీ హోవెల్: ఈ ఇంగ్లీష్ ఆల్రౌండర్ను వేలంపాటలో పంజాబ్ కింగ్స్ దక్కించుకుంది. అయితే జట్టులో ఇప్పటికే మంచి విదేశీ ఆటగాళ్లు ఉండటం వల్ల బెన్నీ హోవెల్కు అవకాశాలు దక్కలేదు. రిజ్వర్ బెంచ్కే పరిమితమయ్యాడు. తన సత్తా చూపేందుకు ఒక్క ఛాన్స్ కూడా ఇవ్వకపోవడంపై బెన్నీ తీవ్ర అసహనంతో ఉన్నాడు. ఇదే అభిప్రాయాన్ని ట్విట్టర్లో బాహటంగానే వ్యక్తం చేశాడు. సన్రైజర్స్తో మ్యాచ్లో తనకు చోటివ్వకపోవడంపై అసంతృప్తితో ట్వీట్ చేశాడు. దీంతో ఫ్రాంచైజీ కూడా అతనిపై అనాసక్తితో ఉన్నట్లు తెలుస్తోంది. వచ్చే వేలంపాటకు అతన్ని విడుదల చేసే అవకాశం ఉంది.
డేరిల్ మిచెల్: ఈ కివీస్ టాప్ ఆర్డర్ బ్యాటర్ గతేడాది టీ20 వరల్డ్ కప్లో అద్భుత ప్రదర్శనతో అందరి దృష్టిని ఆకర్షించాడు. రాజస్థాన్ రాయల్స్ ఇతడ్ని వేలంపాటలో కొనుగోలు చేసింది. అయితే ఈ సీజన్ మొత్తంలో అతనికి రెండు మ్యాచుల్లో ఆడే అవకాశమే దక్కింది. అందులో మొత్తం 33 పరుగులు చేశాడు. రాయల్స్ టాప్ ఆర్డర్లో దేవ్దత్ పడిక్కల్, యశస్వి జైశ్వాల్, జోస్ బట్లర్ వంటి మంచి ఆటగాళ్లు ఉండటం వల్ల మిచెల్కు అవకాశాలు దక్కడం లేదు. దీంతో ఈ ఆటగాడ్ని రాజస్థాన్ రాయల్స్ వదులుకునే అవకాశం ఉంది. అయితే 2023 సీజన్కు ఇతడ్ని కొనుగోలు చేసేందుకు ఇతర ఫ్రాంచైజీలు కూడా ఆసక్తి చూపకపోవచ్చు. ఈలోపు అంతర్జాతీయ మ్యాచుల్లో విశేషంగా రాణిస్తే మాత్రం ఫ్రాంచైజీ ఇతనివైపు చూసే అవకాశం ఉంది.
ఆరోన్ ఫించ్: ఆరోన్ ఫించ్ ఇప్పటికే ఐపీఎల్లో చాలా జట్ల తరఫున ఆడాడు. 2022 సీజన్కు కోలకతా నైట్ రైడర్స్ అతడ్ని అలెక్స్ హేల్స్ స్థానాన్ని భర్తీ చేసేందుకు కొనుగోలు చేసింది. రెండు మ్యాచుల్లో మినహా ఫించ్ ప్రదర్శన అంతంతమాత్రంగానే ఉంది. దీంతో సీజన్ చివరి మ్యాచ్లకు ముందే అతడ్ని జట్టు యాజమాన్యం పక్కకుపెట్టింది. అంతేకాదు వచ్చే వేలంపాటకు అతడ్ని విడుదల చేసే అవకాశం ఉంది. అంతర్జాతీయ మ్యాచుల్లో అద్భుతంగా రాణించే ఫించ్.. ఐపీఎల్కు వచ్చేసరికి ఏమాత్రం ఆకట్టుకోవడం లేదు. ఆస్ట్రేలియా కెప్టెన్ అయిన ఈ ఆటగాడు వచ్చే ఏడాది వన్డే ప్రపంచకప్ను దృష్టిలో ఉంచుకుని వేలంపాటుకు అందుబాటులో ఉండే అవకాశాలు తక్కువే.
డేవిడ్ విల్లీ: ఈ ఇంగ్లాండ్ ఆల్రౌండర్ను రాయల్ ఛాలెంజర్స్ బెంగళూరు కొనుగోలు చేసింది. మొదట్లో ఛాన్స్లు ఇచ్చినప్పటికీ ఇతడు ఏమాత్రం ప్రభావం చూపలేకపోయాడు. దీంతో జట్టు యాజమాన్యం అతడ్ని పక్కకు పెట్టింది. ఆస్ట్రేలియా లెఫ్ట్ ఆర్మ్ పేసర్ బెహ్రెన్డార్ఫ్ ఇప్పటికే ఆర్సీబీ రిజర్వ్డ్ ప్లేయర్లలో ఉన్నాడు. దీంతో డేవిడ్ విల్లీని వచ్చే వేలంపాటకు విడుదల అవకాశం ఉంది. ఈ ఏడాది ఆర్సీబీ తరఫున నాలుగు మ్యాచ్లు ఆడిన విల్లీ.. కేవలం ఒకే ఒక్క వికెట్ పడగొట్టాడు. టీ20లో అనుభవజ్ఞుడైన ఆటగాడి నుంచి ఇది ఏమాత్రం మంచి ప్రదర్శన కాదు.
మాథ్యూ వేడ్ : గతేడాది ఆస్టేలియా టీ20 వరల్డ్కప్ గెలవడంలో కీలక పాత్ర పోషించిన మాథ్యూ వేడ్.. ఐపీఎల్లో మాత్రం దారుణంగా విఫలమయ్యాడు. పాయింట్ల పట్టికలో అగ్రస్థానంలో ఉన్న గుజరాత్ టైటాన్స్ తరఫున ఆడిన ఈ లెఫ్ట్ హ్యాండ్ బ్యాటర్.. స్థాయికి తగ్గ ప్రదర్శన చేయలేకపోయాడు. ఈ సీజన్లో 9 మ్యాచ్లు ఆడి 16.56 సగటు, 116.4 స్ట్రయిక్ రేట్తో కేవలం 149 పరుగులే చేశాడు. టాప్ ఆర్డర్ను మరింత పటిష్ఠం చేసుకోవాలనుకుంటున్న గుజరాత్.. వచ్చే వేలంపాటలో వేడ్ను వదులుకొని, మరో మంచి ఆటగాడ్ని కొనుగోలు చేసే అవకాశం ఉంది.
ఇదీ చదవండి: IPL 2022: అరంగేట్రంలోనే ఫైనల్కు గుజరాత్.. రాజస్థాన్పై గెలుపు
