IPL 2022 RCB VS PBKS: ఐపీఎల్ 2022లో భాగంగా డీవై పాటిల్ వేదికగా పంజాబ్ జట్టుతో జరుగుతున్న మ్యాచ్లో బెంగళూరు జట్టు బ్యాటర్లు అదరగొట్టారు. నిర్ణీత 20 ఓవర్లలో 2 వికెట్ల నష్టానికి 205 పరుగులు చేశారు. పంజాబ్ జట్టుకు 206 పరుగుల లక్ష్యాన్ని నిర్దేశించారు. ఆర్సీబీ కెప్టెన్ డుప్లెసిస్(88) మూడు ఫోర్లు, ఏడు సిక్సర్లతో దుమ్మురేపగా.. మాజీ కెప్టెన్ విరాట్ కోహ్లీ(41*) తనవంతుగా మంచి ఇన్నింగ్స్ ఆడాడు.
టాస్ ఓడి బ్యాటింగ్కు దిగిన బెంగళూరు జట్టు ఓపెనర్లు డుప్లెసిస్, అనుజ్ రావత్ శుభారంభం చేశారు. 21 పరుగులు చేసిన అనుజ్ రావత్.. రాహుల్ చాహర్ బౌలింగ్‌లో క్లీన్‌బౌల్డ్‌ అయ్యాడు. ఇక, కొత్త కెప్టెన్ డుప్లెసిస్ ఆకాశమే హద్దుగా చెలరేగుతున్న సమయంలో క్రీజులోకి మాజీ సారథి విరాట్ కోహ్లీ వచ్చాడు. అతడు కూడా తనదైన ఇన్నింగ్స్ ఆడడం వల్ల స్కోరుబోర్డు పరుగులు పెట్టింది. 88 పరుగులతో కెప్టెన్ ఇన్నింగ్స్ ఆడిన డుప్లెసిస్.. అర్ష్‌దీప్‌ సింగ్ బౌలింగ్‌లో షారుక్‌ఖాన్‌కు క్యాచ్‌ ఇచ్చి వెనుదిరిగాడు. అనంతరం బ్యాటింగ్కు వచ్చిన దినేశ్‌ కార్తీక్‌.. విధ్వంసాన్ని కొనసాగించాడు. 3 ఫోర్లు, 3 సిక్సర్లతో 14 బంతుల్లోనే 32 పరుగులతో నాటౌట్గా నిలిచాడు. పంజాబ్ బౌలర్లలో రాహుల్ చాహర్, అర్షదీప్ సింగ్ తలో వికెట్ పడగొట్టారు. ఈ సీజన్లో 200 ప్లస్‌ స్కోరు సాధించిన తొలి జట్టుగా ఆర్సీబీ నిలిచింది.
ఇదీ చదవండి: IPL 2022: ముంబయిపై ఘనవిజయం సాధించిన దిల్లీ
