అబుదాబి వేదికగా శుక్రవారం జరిగిన ఎలిమినేటర్ పోరులో సన్రైజర్స్ హైదరాబాద్ అదరగొట్టింది. ఉత్కంఠ భరితంగా సాగిన మ్యాచ్లో బెంగళూరును ఇంటికి పంపి, 6 వికెట్ల తేడాతో విజయం సాధించింది. తమ విజయంలో కీలక పాత్ర పోషించిన హోల్డర్, విలియమ్సన్, నటరాజన్లపై ప్రశంసల జల్లులు కురిపించాడు హైదరాబాద్ సారథి డేవిడ్ వార్నర్. దిల్లీతో జరిగే క్వాలిఫయర్-2 మ్యాచ్ కోసం ఆత్రుతతో ఉన్నామని చెప్పాడు.
"సందీప్ శర్మ, హోల్డర్ను తొలి ఐదు ఓవర్లలో బౌలింగ్కు దింపాలనుకున్నాం. తర్వాత రషీద్, నటరాజన్కు అవకాశం ఇవ్వాలని అనుకున్నాం. రషీద్ ఖాన్ మీద చాలా ఒత్తిడి ఉంది. నటరాజన్ అదరగొట్టాడు. పరుగులు సాధించడంలో కేన్ కీలకంగా నిలిచాడు. ఒత్తిడితో కూడిన ఇన్నింగ్స్ను అద్భుతంగా ఆడాడు. మిడిల్ ఓవర్లలో మా బౌలర్లు చాలా చక్కగా రాణించారు. మేము ఇంకా దిల్లీతో ఆడాల్సి ఉంది. ప్రపంచ స్థాయి బౌలర్లు ఉన్న ఆ జట్టుపై ఆడడానికి చాలా ఆత్రుతతో ఉన్నాం."
-- డేవిడ్ వార్నర్, సన్రైజర్స్ హైదరాబాద్ కెప్టెన్.
ఒత్తిడికి గురిచేశారు..
హైదరాబాద్ జట్టు సమష్టి ప్రదర్శనతో తమను ఒత్తిడికి గురి చేసిందని అన్నాడు బెంగళూరు సారథి కోహ్లీ. సెకండ్ హాఫ్లో తాము తగినట్టుగా ప్రదర్శన చేయలేకపోయామని అసంతృప్తి వ్యక్తం చేశాడు. సీజన్లో కీలకంగా నిలిచిన దేవ్దత్ పడిక్కల్ను కోహ్లీ అభినందించాడు.
"మా తొలి ఇన్నింగ్స్లో మేము పరుగుల్ని రాబట్టలేక తడబడ్డాము. రెండో భాగంలో మేము సరిగా ప్రదర్శన చేయలేకపోయాం. హైదరాబాద్ జట్టు సమష్టిగా ఆడి మమ్మల్ని ఒత్తిడికి గురి చేసింది. మా జట్టులో ఈ సీజన్లో కొంత మంది చాలా చక్కగా ప్రదర్శన చేశారు. వారిలో దేవ్దత్ పడిక్కల్ ఒకడు. మాకు ఉన్న సానుకూలాంశాలలో అతడు కీలకమైన వాడు. సిరాజ్ తిరిగి పుంజుకున్నాడు. చాహల్ అండగా నిలిచాడు. ఎప్పటిలాగే ఏబీ ఆదుకున్నాడు. మిగతా వాళ్లు ఇంకా రాణించాల్సి ఉంది. క్లిష్ట పరిస్థితుల మధ్య యూఏఈలో జరిగిన ఈ సీజన్ రసవత్తరంగా సాగింది. ప్రతి ఏడాది మాకు మద్దతునిస్తున్న అభిమానులకు ధన్యవాదాలు."
-- విరాట్ కోహ్లీ, రాయల్ ఛాలెంజర్స్ బెంగళూరు కెప్టెన్.
తొలుత టాస్‌ ఓడి బ్యాటింగ్‌కు దిగిన కోహ్లీసేన నిర్ణీత 20 ఓవర్లలో ఏడు వికెట్లు కోల్పోయి 131 పరుగులు చేసింది. 132 పరుగులే లక్ష్యంగా బరిలో దిగిన సన్రైజర్స్ హైదరాబాద్ ఇన్నింగ్స్లో మరో రెండు బంతులు మిగిలుండగానే ఛేదించింది. కేన్ విలియమ్సన్ అర్ధశతకంతో అలరించగా.. జేసన్ హోల్డర్ ఆల్రౌండర్ ప్రదర్శనతో జట్టును విజయ తీరాలకు చేర్చాడు.
బెంగళూరు తరఫున ఈ సీజన్లో 473 పరుగులతో అత్యధిక రన్స్ చేసిన ఆటగాడిగా నిలిచాడు దేవ్దత్ పడిక్కల్.
ఇదీ చూడండి:వార్నర్ సేన అదరహో.. బెంగళూరు ఇంటికి
