'విజయం మా చేతుల్లోనే ఉంది' అనే నమ్మకంతో ఉన్న మ్యాచ్లో అనూహ్యంగా పరాజయం ఎదురైందని అంటున్నాడు కింగ్స్ ఎలెవన్ పంజాబ్ కెప్టెన్ కేఎల్ రాహుల్. ఆదివారం జరిగిన మ్యాచ్లో రాజస్థాన్ బ్యాట్స్మెన్ తమ బౌలర్లపై ఒత్తిడి తీసుకురావడంలో విజయం సాధించారని తెలిపాడు. రాజస్థాన్ గెలుపొందడంలో సంజూ శాంసన్, రాహుల్ తెవాతియా కీలకపాత్ర పోషించారని వెల్లడించాడు.
"టీ20 క్రికెట్ను మేం చాలా ఏళ్లుగా గమనిస్తున్నాం. రాజస్థాన్పై మ్యాచ్లో చాలా బాగా రాణించాం. కానీ, కొన్ని విషయాల్లో కలిసి రాలేదు. కొన్నిసార్లు ఇలాంటివి జరుగుతాయి. నిజం చెప్పాలంటే గెలుపు మదే అనే నమ్మకంతో ఉన్నాం. కానీ, చివరికి ప్రత్యర్థి బ్యాట్స్మెన్ దాటికి మా బౌలర్లు ఒత్తిడికి లోనయ్యారు. గత రెండు మ్యాచ్ల్లో మా బౌలర్లు అద్భుతంగా రాణించారు. లీగ్ ప్రారంభంలోనే పరాజయం రావడం మంచిదే. దీని వల్ల ఎంతో నేర్చుకుని మరింత బలంగా రాణిస్తాం. సంజూ శాంసన్, రాహుల్ తెవాతియా అద్భుత బ్యాటింగ్ ప్రదర్శన చేశారు. వారు ఈ విజయానికి అర్హులు."
- కేఎల్ రాహుల్, కింగ్స్ ఎలెవన్ పంజాబ్ కెప్టెన్
పంజాబ్ నిర్దేశించిన 224 పరుగుల భారీ లక్ష్యాన్ని రాజస్థాన్ 6 వికెట్లు కోల్పోయి మూడు బంతులు మిగిలి ఉండగానే ఛేదించింది. దీంతో టోర్నీ చరిత్రలోనే ఈ జట్టు అత్యధిక పరుగుల లక్ష్యాన్ని ఛేదించి సరికొత్త రికార్డు నెలకొల్పింది.
తొలుత బ్యాటింగ్కు దిగిన కింగ్స్ ఎలెవన్ పంజాబ్ జట్టు 20 ఓవర్లలో రెండు వికెట్లు కోల్పోయి 223 పరుగులు సాధించింది. ఛేదనలో రాజస్థాన్ రాయల్స్ జట్టు నిర్ణీత ఓవర్లలో మరో మూడు బంతులు మిగిలి ఉండగానే లక్ష్యాన్ని చేరుకుంది. ప్రారంభంలో బట్లర్‌(4) విఫలమైనా సంజూ శాంసన్(85; 42 బంతుల్లో 4x4, 7x6), స్టీవ్‌స్మిత్‌(50; 27 బంతుల్లో 7x4, 2x6) చెలరేగి ఆడారు. వీరిద్దరూ పంజాబ్ బౌలర్లపై ఎదురుదాడి చేసి ఓవర్‌కు పది పరుగుల చొప్పున రాబట్టారు. రాహుల్ తెవాతియా(53; 31 బంతుల్లో 7x6) తొలుత పరుగులు చేసేందుకు ఇబ్బంది పడ్డాడు. తాను ఎదుర్కొన్న తొలి 19 బంతుల్లో 8 పరుగులే చేశాడు. ఇక పరిస్థితి చేయి దాటిపోతున్న వేళ సంజూ విజృంభించి ఆడాడు. సంజూ శాంసన్, రాహుల్ తెవాతియా అద్భుత బ్యాటింగ్ ప్రదర్శనతో రాజస్థాన్ జట్టును విజయం వరించింది.
