ఐపీఎల్ 2020లో ముంబయి ఇండియన్స్ జట్టు ఆరంభంలో కొద్దిగా తడబడినా..ఆధిపత్య ప్రదర్శనతో ప్లేఆఫ్స్కు చేరిన తొలి జట్టుగా నిలిచింది. ఆ తర్వాత ఫైనల్కు అర్హత సాధించి.. ఐదోసారి విజేతగా నిలిచింది. ఐపీఎల్లో ఆధిపత్యం చలాయించిన జట్టు టీ20 ప్రపంచకప్నూ సాధించగలదని ఇంగ్లాండ్ మాజీ కెప్టెన్ మైకేల్ వాన్ అభిప్రాయపడ్డాడు.
"ముంబయి ఇండియన్స్ జట్టు టీ20 ప్రపంచకప్ ట్రోఫీని గెలుచుకుంటుందని నేను భావిస్తున్నా" అని మైకేల్ వాన్ ట్వీట్ చేశాడు. ముంబయి ఇండియన్స్కు కెప్టెన్గా రోహిత్శర్మ బాధ్యతలు స్వీకరించిన ఎనిమిదేళ్లలో ఆ జట్టు ఐదోసారి విజేతగా నిలిచింది. ప్రపంచ క్రికెట్లోనే అత్యంత ఆధిపత్యం చెలాయించే టీ20 జట్లలో ఒకటిగా ముంబయి అవతరించిందని క్రికెట్ విశ్లేషకులు అంటున్నారు.
తన కెరీర్లో 15వ టీ20 టైటిల్ను గెలుచుకున్న ప్రముఖ క్రికెటర్ కిరన్ పొలార్డ్ కూడా మైకేల్ వాన్ వ్యాఖ్యలను సమర్థించాడు. "అక్కడ ఎన్ని ట్రోఫీలైతే ఉన్నాయో.. అంతే టాలెంట్ ఆ జట్టులోని ఆటగాళ్లలో ఉంది. టీ20ల్లో ముంబయి ఇండియన్స్ ఉత్తమ జట్టు అని చెప్పవచ్చు. ఆ జట్టు యాజమాన్యం, సహాయక సిబ్బంది కృషే అన్ని విజయాలు సాధించడానికి కారణం" అని పొలార్డ్ తెలిపాడు.
