దిల్లీ క్యాపిటల్స్ బ్యాట్స్మన్ మార్కస్ స్టోయినిస్ వల్లే తమ జట్టు విజయానికి దూరమైందని అన్నాడు కింగ్స్ ఎలెవన్ పంజాబ్ బ్యాట్స్మన్ మయాంక్ అగర్వాల్. అతడి వల్లే తాము లక్ష్యాన్ని చేరుకోవడానికి మరింత కష్టపడాల్సి వచ్చిందని తెలిపాడు.
"ఈ మ్యాచ్లో స్టోయినిస్ అద్భుత ప్రదర్శన చేశాడు. దిల్లీ జట్టు తక్కువ స్కోరు ఉన్నప్పుడు బ్యాటింగ్ బరిలో దిగి.. డెత్ ఓవర్లలో పరుగులు రాబట్టాడు. తక్కువ లక్ష్యంతో ఆడొచ్చని అనుకున్నాం. కానీ, అతడి విధ్వంసకర బ్యాటింగ్ వల్ల ఛేదనలో మేము ఇంకొంత కష్టపడాల్సి వచ్చింది. స్టోయినిస్ తన ప్రణాళికను చక్కగా అమలు చేశాడు. కేవలం చివరి ఓవర్లోనే 30 రన్స్ రాబట్టింది దిల్లీ జట్టు. ఏదిఏమైనా మా తర్వాతి మ్యాచ్లో ఇలాంటి తప్పిదాలు రాకుండా జాగ్రత్త వహిస్తాం."
- మయాంక్ అగర్వాల్, కింగ్స్ ఎలెవన్ పంజాబ్ బ్యాట్స్మన్
పంజాబ్తో జరిగిన మ్యాచ్లో మార్కస్ స్టోయినిస్ ఆల్రౌండ్ ప్రతిభ కనబరిచాడు. బ్యాటింగ్లో కేవలం 21 బంతులను ఎదుర్కొని 54 పరుగులు రాబట్టాడు. బౌలింగ్లోనూ మూడు ఓవర్లు వేసి రెండు వికెట్లను దక్కించుకుని 'మ్యాన్ ఆఫ్ ది మ్యాచ్'గా నిలిచాడు.
మయాంక్ ఇన్నింగ్ వృథా
తొలుత బ్యాటింగ్లో దిల్లీ 8 వికెట్ల నష్టానికి 157 పరుగులు చేసింది. కష్టతరమైన పిచ్‌పై ఛేదనలో పంజాబ్‌కు శుభారంభం లభించలేదు. దాదాపు 15 ఓవర్ల వరకు నెమ్మదిగానే ఆడింది. అయితే మయాంక్ అగర్వాల్ (89; 60 బంతుల్లో 7×4, 4×6) గేర్ మార్చడం వల్ల విజయానికి చేరువైంది. ఆఖరి ఓవర్లో 13 పరుగులు చేస్తే విజయం అనగా కింగ్స్ 12 పరుగులే చేసింది. ఫలితంగా మ్యాచ్ టై అయ్యి సూపర్ ఓవర్కు దారితీసింది.
దుబాయ్ అంతర్జాతీయ స్టేడియంలో సెప్టెంబరు 24న రాయల్ ఛాలెంజర్స్ బెంగళూరు జట్టుతో తన తర్వాతి మ్యాచ్లో తలపడనుంది కింగ్స్ ఎలెవన్ పంజాబ్.
