ఆడిన రెండు మ్యాచ్ల్లోనూ విజయం సాధించి మూడో గెలుపుపై కన్నేసింది చెన్నై సూపర్ కింగ్స్. మరోవైపు రెండు వరుస పరాజయాలనెదుర్కొన్న రాయల్స్ గెలుపు కోసం తాపత్రయపడుతోందు. ఈ రెండింటి మధ్య చెన్నై వేదికగా నేడు మ్యాచ్ జరగనుంది.
సొంతగడ్డపై రెండో మ్యాచ్ ఆడుతున్న ధోనీసేన రాజస్థాన్పై సత్తాచాటి పాయింట్ల పట్టికలో అగ్రస్థానానికి చేరాలనుకుంటోంది. తొలి మ్యాచ్లో రాయల్ ఛాలెంజర్స్ బెంగళూరును 70 పరుగులకే కట్టడి చేసింది సూపర్కింగ్స్. దిల్లీతో జరిగిన రెండో మ్యాచ్లోనూ ఆకట్టుకునే ప్రదర్శన చేసి విజయం సాధించింది.
పంజాబ్తో జరిగిన తొలి మ్యాచ్లో రాజస్థాన్కు అనూహ్య ఓటమి ఎదురైంది. రెండో మ్యాచ్లోనూ సంజూ శాంసన్ శతకం చేసినప్పటికీ బౌలర్ల పేలవ ప్రదర్శనతో ఓటమి చవి చూసింది.
చెన్నై సూపర్ కింగ్స్
గత రెండు మ్యాచుల్లోనూ చెన్నై జట్టులో బౌలర్లు అద్భుతంగా రాణించారు. హర్భజన్, తాహిర్, బ్రావో, జడేజాల ధాటికి ప్రత్యర్థి జట్లు తక్కువ స్కోరుకే పరిమితమయ్యాయి. మరోసారి అలాగే సత్తా చాటాలని చెన్నై అభిమానులు ఆశిస్తున్నారు.
బౌలర్ల స్థాయిలో బ్యాట్స్మెన్ ప్రదర్శన లేదు. బెంగళూరు మ్యాచ్లో లక్ష్యం చిన్నదైనా ఛేదించడానికి 18 ఓవర్లు తీసుకున్నారు. రెండో మ్యాచ్ కూడా చివరి ఓవర్ వరకు ఉత్కంఠభరితంగా సాగింది. వాట్సన్, రైనా, ధోనీలపైనే ఎక్కువగా ఆధారపడుతుంది చెన్నై. రాయుడు ఫామ్ అందుకోవాల్సి ఉండగా, డుప్లెసిస్ను వినియోగించుకోవాల్సి ఉంది.
రాజస్థాన్ రాయల్స్
బ్యాట్స్మెన్ రాణిస్తున్నప్పటికీ బౌలర్ల ప్రదర్శనే ఆందోళన కలిగిస్తోంది. తొలి మ్యాచ్లో ప్రత్యర్థికి 180 పరుగులిస్తే... రెండో మ్యాచ్లో 198 పరుగుల లక్ష్యాన్ని బౌలర్లు కాపాడలేకపోయారు. బ్యాటింగ్లో బలంగా కనిపిస్తోంది రాజస్థాన్ జట్టు. రెండు మ్యాచ్ల్లోనూ శాంసన్ విజృంభించాడు. ముఖ్యంగా హైదరాబాద్తో జరిగిన మ్యాచ్లో శతకంతో అదరగొట్టాడు.
బట్లర్ తొలి మ్యాచ్లో అర్ధశతకంతో ఆకట్టుకున్నాడు. రెండో మ్యాచ్లో 70 పరుగుల చేసి.. కెప్టెన్ రహానే ఫామ్లోకి రావడం కలిసొచ్చే అంశం. తొలిమ్యాచ్లో స్టీవ్ స్మిత్ విఫలమవగా, రెండో మ్యాచ్లో బ్యాటింగ్ రాలేదు. చెన్నైపై స్మిత్ రాణించాలని రాయల్స్ అభిమానులు కోరుకుంటున్నారు. బ్యాటింగ్లో మెరుస్తున్నా సమష్టి ప్రదర్శనలో విఫలమవుతోంది రాయల్స్ జట్టు.
జట్ల అంచనా:
చెన్నై సూపర్ కింగ్స్:
మహేంద్ర సింగ్ ధోని(కెప్టెన్), షేన్ వాట్సన్, అంబటి రాయుడు, సురేశ్ రైనా, కేదార్ జాదవ్, బ్రావో, రవీంద్ర జడేజా, దీపక్ చహర్, శార్దుల్ ఠాకుర్, హర్భజన్ సింగ్, ఇమ్రాన్ తాహిర్, మురళీ విజయ్, కరణ్ శర్మ, డేవిడ్ విల్లీ
రాజస్థాన్ రాయల్స్:
అజింక్య రహానే(కెప్టెన్), బట్లర్, సంజూ శాంసన్(కీపర్), స్మీవ్ స్మిత్, బెన్ స్టోక్స్, రాహుల్ త్రిపాఠి, కృష్ణప్ప గౌతమ్, జోఫ్రా ఆర్చర్, జయదేవ్ ఉనద్కత్, శ్రేయాస్ గోపాల్, ధవల్ కులకర్ణి, స్టువర్ట్ బిన్ని, వరుణ్ ఆరోన్, మనన్ వోహ్రా.
