టీమ్ఇండియా(Team India) పేస్ బౌలర్లపై ప్రశంసలు కురిపించాడు ఆస్ట్రేలియా మాజీ కెప్టెన్ ఇయాన్ చాపెల్(Ian Chappell). భారత పేస్ విభాగం.. ప్రస్తుతం పేస్ బౌలింగ్ నైపుణ్యం కలిగిన జట్ల సరసన చేరిందని కితాబిచ్చాడు. డబ్ల్యూటీసీ ఫైనల్లో ఓడినప్పటికీ.. ఇషాంత్, బుమ్రా, షమీ, సిరాజ్తో కూడిన బౌలింగ్ దళం పటిష్ఠంగా ఉందని అభిప్రాయపడ్డాడు.
"గత కొద్ది కాలంగా టీమ్ఇండియా బౌలింగ్ మెరుగుపడింది. ఈ క్రమంలో ఆస్ట్రేలియాలో విజయంతో పాటు ప్రతిష్ఠాత్మక ఫైనల్కు అర్హత సాధించారు. ఇప్పుడు ఇంగ్లాండ్ను వారి గడ్డపై ఓడించే అవకాశం లేకపోలేదు. వారి పేస్ బౌలర్లు మెరుగైన ఫలితాలను రాబడుతున్నారు."
-ఇయాన్ చాపెల్, ఆస్ట్రేలియా మాజీ కెప్టెన్.
ఇక డబ్ల్యూటీసీ ఫైనల్లో కివీస్ బౌలింగ్పై ఇయాన్ స్పందించాడు. వారి పేస్ విభాగం సమర్థంగా పని పూర్తి చేశారని తెలిపాడు. టిమ్ సౌథీ, ట్రెంట్ బౌల్ట్, నీల్ వాగ్నర్, కైల్ జేమీసన్.. ఆట చివరి రోజు అత్యుత్తమంగా రాణించారని గుర్తుచేశాడు. దీంతో ఫలితమే తేలదనుకున్న మ్యాచ్లో న్యూజిలాండ్ విజేతగా నిలిచిందని పేర్కొన్నాడు. వీరి బౌలింగ్ విభాగం 1970-90 వరకు బౌలింగ్లో ఆధిపత్యం ప్రదర్శించిన విండీస్ బౌలర్లతో పోల్చాడు చాపెల్.
"డబ్ల్యూటీసీ గణాంకాలను పరిశీలిస్తే కైల్ జేమీసన్ కివీస్ బౌలింగ్ విభాగానికి నాయకత్వం వహించినట్లు అనిపించింది. కానీ, నిజానికి టిమ్ సౌథీ.. న్యూజిలాండ్ బౌలింగ్ దాడికి సారథిగా ఉన్నాడు" అని చాపెల్ అభిప్రాయపడ్డాడు.
ఇదీ చదవండి: 'పృథ్వీని తీసుకుంటే వారిని అవమానించినట్లే'
