IND VS SL: శ్రీలంకతో తొలి టెస్ట్లో భారత్ ఘన విజయం సాధించింది. తొలి ఇన్నింగ్స్లో 174 పరుగులకే ఆలౌటైన లంక ఫాలో ఆన్లోనూ చతికిలపడింది. ఫాలోఆన్ బ్యాటింగ్ దిగిన శ్రీలంక జట్టు 178 పరుగులు చేసి కుప్పకూలింది. ఆల్రౌండర్ రవీంద్ర జడేజా 4 వికెట్లు తీసి లంకను ఆలౌట్ చేయడంలో కీలక పాత్ర పోషించాడు. రవిచంద్రన్ అశ్విన్ 4 వికెట్లు, మహ్మద్ షమీ 2 వికెట్లు తీశారు. దీంతో మూడు రోజుల్లోనే మ్యాచ్ ముగిసింది.
మూడో రోజు ఆటలో భాగంగా తొలి సెషన్లో భారత బౌలర్లు అదరగొట్టారు. జడేజా ఐదు వికెట్లు తీశాడు. నిస్సంక (61*) ఒక్కడే అర్ధ శతకంతో రాణించాడు. మిగతా బ్యాటర్లంతా పూర్తిగా విఫలమయ్యారు. ఆదివారం ఓవర్నైట్ స్కోరుతో మూడో రోజు ఆట కొనసాగించిన శ్రీలంక మరో 66 పరుగులు జోడించి మిగిలిన ఆరు వికెట్లు కోల్పోయింది. అంతకుముందు ఓవర్నైట్ బ్యాటర్లు అసలంక, నిస్సంక తొలి గంట సేపు జాగ్రత్తగా ఆడారు. అయితే, ఈ జోడీని బుమ్రా విడదీశాడు. జట్టు స్కోరు 161 పరుగుల వద్ద అసలంకను ఎల్బీడబ్ల్యూగా వెనక్కి పంపడం వల్ల లంక సగం వికెట్లు కోల్పోయింది. అనంతరం భారత బౌలర్లు చెలరేగి 13 పరుగుల తేడాతో మిగిలిన ఐదు వికెట్లు పడగొట్టారు. ఈ క్రమంలోనే జడేజా ఐదు వికెట్ల ఘనత సాధించాడు. బుమ్రా, అశ్విన్ తలో రెండు వికెట్లు తీయగా.. షమీ ఓ వికెట్ దక్కించుకున్నాడు. దీంతో భారత్ తొలి ఇన్నింగ్స్లో 400 పరుగుల సంపూర్ణ ఆధిక్యం లభించింది. వెంటనే శ్రీలంకను ఫాలోఆన్కు దించింది భారత్.
మరోవైపు, లెజెండరీ క్రికెటర్ కపిల్దేవ్ రికార్డును బ్రేక్ చేశాడు స్టార్ స్పిన్నర్ రవిచంద్రన్ అశ్విన్. ఆదివారం శ్రీలంకతో తొలి టెస్టు సందర్భంగా 436 వికెట్లతో సుదీర్ఘ ఫార్మాట్లో భారత తరపున రెండో అత్యధిక వికెట్ల వీరుడిగా నిలిచాడు. ఈ క్రమంలోనే కపిల్ను (131 మ్యాచ్ల్లో 434 వికెట్లు) అధిగమించాడు. తన 85వ మ్యాచ్లోనే అశ్విన్ ఈ ఘనత దక్కించుకున్నాడు. ఈ జాబితాలో 132 మ్యాచ్ల్లో 619 వికెట్లతో స్పిన్ దిగ్గజం అనిల్ కుంబ్లే అగ్రస్థానంలో ఉన్నాడు.
భారత్ తొలి ఇన్నింగ్స్లో ఆల్రౌండర్ రవీంద్ర జడేజా 175 పరుగుల చేయడం వల్ల 574 పరుగలకు డిక్లెర్ చేసింది. కీపర్ రిషభ్ పంత్ 96, రవిచంద్రన్ అశ్విన్ 61, విరాట్ కోహ్లీ 45 పరుగులు చేశారు.
ఇదీ చదవండి: కపిల్ దేవ్ రికార్డు బ్రేక్.. టెస్టుల్లో అశ్విన్ అరుదైన ఘనత
