IND VS ENG Ravindra Jadeja: ఇంగ్లాండ్తో జరుగుతోన్న టెస్టు మ్యాచ్లో జడ్డూ(104).. అద్భుత ఇన్నింగ్స్ ఆడాడు. సెంచరీతో చెలరేగాడు. తొలి ఇన్నింగ్స్‌లో టీమ్ఇండియా 98 పరుగులకే 5 వికెట్లు కోల్పోయి పీకల్లోతు కష్టాల్లో ఉన్న సమయంలో ఎంట్రీ ఇచ్చిన అతడు.. పంత్తో(146) కలిసి 222 పరుగుల భారీ భాగస్వామ్యం నిర్మించి ఇన్నింగ్స్‌ను నిలబెట్టాడు. దీంతో భారత్‌ 416 పరుగులు చేయగలిగింది. అయితే జడ్డూ ఇలాంటి ప్రదర్శన చేయడం కొత్తేమీ కాదు. అయితే ఈ మ్యాచ్కు ముందు అతడు గడ్డు కాలాన్ని ఎదుర్కొన్నాడు. ఈసారి టీ20 లీగ్‌లో టోర్నీ ప్రారంభానికి ముందే చెన్నై కెప్టెన్‌గా ఎంపికైన అతడు ఆ జట్టును నడిపించడంలో పూర్తిగా విఫలమయ్యాడు. సారథిగానే కాకుండా బ్యాటర్గానూ తేలిపోయాడు. కానీ మళ్లీ ఈ మ్యాచ్తో తిరిగి ఫామ్లోకి వచ్చాడు. తానేంటో నిరూపించుకున్నాడు. ఈ నేపథ్యంలో అతడు గతంలో టీమ్ను ఆదుకున్న సందర్భాలను నెమరువేసుకుందాం...
జడేజా ఆదుకున్న మ్యాచ్‌లు..
- గతేడాది ఇంగ్లాండ్ పర్యటనలో ఇదే సిరీస్‌లోని తొలి టెస్టు తొలి ఇన్నింగ్స్‌లో టీమ్ఇండియా టాప్‌ ఆర్డర్‌ విఫలమైనా జడేజా (56; 86 బంతుల్లో 8x4, 1x6) అర్ధ శతకంతో రాణించాడు. దీంతో జట్టు 95 పరుగుల ఆధిక్యం సంపాదించడంలో కీలక పాత్ర పోషించాడు. అయితే, చివరికి ఈ మ్యాచ్ డ్రాగా ముగిసింది.
- ఈ ఏడాది టీ20 లీగ్‌కు ముందు మొహాలి వేదికగా శ్రీలంకతో జరిగిన తొలి టెస్టులో ఏకంగా 175 పరుగులు చేశాడు. ఇది అతడి కెరీర్‌లోనే అత్యుత్తమ ఇన్నింగ్స్. దాంతో టీమ్ఇండియా 574/8 (డిక్లేర్డ్‌) భారీ స్కోర్‌ చేసింది. ఆపై బౌలింగ్‌లో రెండు ఇన్నింగ్స్‌ల్లోనూ కలిపి 9 వికెట్లు తీశాడు. ఈ మ్యాచ్లో భారత్‌ ఇన్నింగ్స్ 222 పరుగుల తేడాతో విజయం సాధించింది.
- 2020లో మెల్‌బోర్న్‌ వేదికగా ఆస్ట్రేలియాతో జరిగిన టెస్టు మ్యాచ్లో జడేజా తొలి ఇన్నింగ్స్‌లో 57 పరుగులు చేశాడు. బౌలింగ్‌లో రెండు ఇన్నింగ్స్‌ల్లో కలిపి 3 వికెట్లు తీశాడు. దీంతో ఈ మ్యాచ్లో టీమ్ఇండియా 8 వికెట్ల తేడాతో గెలవడంలో తన వంతు పాత్ర పోషించాడు.
- 2019లో సిడ్నీ క్రికెట్‌ గ్రౌండ్‌లో ఆస్ట్రేలియాతో జరిగిన నాలుగో టెస్టు తొలి ఇన్నింగ్స్‌లోనూ జడేజా 81 పరుగులు చేశాడు. ఆ మ్యాచ్లో టీమ్ఇండియా 622/7 (డిక్లేర్డ్‌ ) భారీ స్కోర్‌ చేసింది. అనంతరం ఆసీస్‌ తొలి ఇన్నింగ్స్‌లో 300 పరుగులు చేయగా జడేజా నాలుగు వికెట్లు తీశాడు. అయితే, ఆ మ్యాచ్ డ్రాగా ముగిసింది.
- 2018లో ఓవల్‌ వేదికగా ఇంగ్లాండ్తో జరిగిన ఐదో టెస్టు తొలి ఇన్నింగ్స్‌లోనూ జడేజా 86 (నాటౌట్‌) పరుగులు చేసి టాప్‌ స్కోరర్‌గా నిలిచాడు. అలాగే బౌలింగ్‌లో రెండు ఇన్నింగ్స్‌ల్లో మొత్తం కలిపి 7 వికెట్లు తీశాడు. అయితే, ఈ మ్యాచ్లో టీమ్ఇండియా ఓటమిపాలైంది.
- 2017లో శ్రీలంక పర్యటనలో రెండో టెస్టు తొలి ఇన్నింగ్స్‌లో తొమ్మిదో నంబర్‌ ఆటగాడిగా వచ్చిన జడేజా 70 పరుగులు చేశాడు. బౌలింగ్‌లో రెండు ఇన్నింగ్స్‌ల్లో కలిపి మరోసారి 7 వికెట్లు సాధించాడు. దీంతో టీమ్ఇండియా ఇన్నింగ్స్ 52 పరుగుల తేడాతో విజయం సాధించడంలో తనవంతు మెరిశాడు.
- 2017లోనే ధర్మశాల వేదికగా ఆస్ట్రేలియాతో జరిగిన టెస్టు మ్యాచ్ తొలి ఇన్నింగ్స్‌లో జడేజా 63 పరుగులు చేశాడు. బౌలింగ్‌లో రెండు ఇన్నింగ్స్‌ల్లో కలిపి 4 వికెట్లు పడగొట్టాడు. ఈ మ్యాచ్లో భారత్‌ 8 వికెట్ల తేడాతో గెలిచింది.
- 2015లో మొహాలి వేదికగా దక్షిణాఫ్రికాతో ఆడిన తొలి టెస్టులో టీమ్ఇండియా తొలి ఇన్నింగ్స్‌లో 201 పరుగులే చేసింది. అందులో జడేజా (38) రెండో టాప్‌ స్కోరర్‌. అనంతరం ఆ జట్టు 184 పరుగులకే కుప్పకూలింది. దక్షిణాఫ్రికా తొలి ఇన్నింగ్స్‌లో 3 వికెట్లు తీసిన జడ్డూ రెండో ఇన్నింగ్స్‌లో 5 వికెట్లు తీశాడు. దీంతో టీమ్ఇండియా విజయంలో మరోసారి కీలకంగా ఆడాడు.
ఇదీ చూడండి: అండర్సన్పై జడ్డూ కామెంట్స్ వైరల్.. వీరిద్దరి మధ్య గొడవ ఏంటి?
