లీడ్స్ హెడ్డింగ్లీ వేదికగా మరికాసేపట్లో ఇంగ్లాండ్- ఇండియా మధ్య మూడో టెస్టు ప్రారంభం కానుంది. ఐదు మ్యాచ్ల సిరీస్లో 1-0తో టీమ్ఇండియా ఆధిక్యంలో ఉంది. అదే ఊపుతో తాజా మ్యాచ్లోనూ విజయాన్ని అందుకోవాలని ఉవ్విళ్లూరుతోంది. లార్డ్స్ టెస్టుకు ప్రతీకారం తీర్చుకోవాలని రూట్ సేన భావిస్తోంది. ఈ మ్యాచ్లో గెలిచి సిరీస్ను సమం చేయాలని ఇంగ్లాండ్ భావిస్తోంది. అయితే అంతకంటే ముందు ఈ టెస్టు ద్వారా ఇరుజట్ల ఆటగాళ్లకు పలు రికార్డులు చేరుకునే అవకాశం ఉంది. అవేంటో ఓ సారి చూద్దాం.
విరాట్ కోహ్లీ..
రికార్డుల రారాజు విరాట్ కోహ్లీ.. అన్ని ఫార్మాట్లలో కలిపి 23 వేల పరుగులు పూర్తి చేసిన ఆటగాడిగా నిలిచేందుకు మరో 63 పరుగుల దూరంలో ఉన్నాడు. మూడు ఫార్మాట్లలో 487 ఇన్నింగ్స్ల్లో ప్రస్తుతం 22,937 పరుగులు సాధించాడు టీమ్ఇండియా రన్ మిషన్. 500లోపు ఇన్నింగ్స్ల్లో ఈ ఫీట్ చేరుకోవడానికి కోహ్లీకి పెద్ద కష్టమేమీ కాదు. ఇంగ్లాండ్ గడ్డపై ఇంకా మూడు టెస్టులు ఉన్న నేపథ్యంలో అతడు ఒక్క ఇన్నింగ్స్లో కుదురుకున్న ఆ మాత్రం స్కోరు సులువుగా చేయగలడు.
ఇక టెస్టుల్లో విరాట్ 2019 నవంబర్లో చివరిసారిగా సెంచరీ మార్క్ను అందుకున్నాడు. ఆ తర్వాత మూడంకెల స్కోరు అందుకోవడానికి కోహ్లీ ప్రయత్నిస్తూనే ఉన్నాడు. తాజా టెస్టులో మన చీకూ ఈ శతకాల కొరత అధిగమిస్తాడని ఆశిద్దాం.
రోహిత్ శర్మ..
ఇటీవల కాలంలో టెస్టుల్లో స్థిరంగా రాణిస్తున్నాడు భారత ఓపెనర్ రోహిత్ శర్మ. ఈ ఫార్మాట్లో అతడు మరో 169 పరుగులు సాధిస్తే టెస్టుల్లో 3వేల పరుగుల మైలురాయిని అందుకుంటాడు. మరో 130 రన్స్ చేస్తే కనుక అన్ని ఫార్మాట్లలో కలిపి 15వేల పరుగులు పూర్తి చేసిన బ్యాట్స్మన్గా నిలుస్తాడు.
ఇషాంత్ శర్మ..
టీమ్ఇండియా ఫాస్ట్ బౌలర్ ఇషాంత్ శర్మ సరికొత్త రికార్డుకు చేరువలో ఉన్నాడు. టెస్టుల్లో జహీర్ ఫీట్ను అధిగమించడానికి అతడికి మరో వికెట్ చాలు. సుదీర్ఘ ఫార్మాట్లో జహీర్.. 311 వికెట్లు తీసుకున్నాడు. జంబూ కూడా అన్నే వికెట్లతో అతడి సరసన ఉన్నాడు.
సామ్ కరన్..
ఇంగ్లాండ్ క్రికెట్ జట్టులో సామ్ కరన్ను ఓ రికార్డును ఊరిస్తోంది. టెస్టుల్లో 50 వికెట్ల క్లబ్లో చేరాలంటే అతడికి మరో 5 వికెట్లు అవసరం.
జో రూట్..
ఇంగ్లాండ్ కెప్టెన్ జో రూట్ ముందు కూడా ఓ రికార్డు ఊరిస్తోంది. అతడి సారథ్యంలో మరో టెస్టు మ్యాచ్ గెలిస్తే అత్యధిక టెస్టు విజయాలు అందుకున్న నాయకుడిగా నిలుస్తాడు. ఇప్పటికే 26 విజయాలతో మైకేల్ వాన్తో సమానంగా ఉన్నాడు.
ఇదీ చదవండి: Virat Kohli: 'అది ప్రత్యర్థి బలాన్ని బట్టి ఉంటుందా?.. ఇదేం ప్రశ్న'
