Rohit Sharma World Cup 2023 : అతడు పది ఓవర్లు క్రీజ్‌లో ఉన్నాడంటే ఇక ప్రత్యర్థులు మ్యాచ్‌పై ఆశలు వదులుకోవాల్సిందే. కుదురుకున్నాడంటే ఇక ఆ రోజు చాలా రికార్డులు గల్లంతైనట్లే అని అనుకోవాల్సిందే. బ్యాట్ పట్టుకుని అలవోకగా సిక్స్‌లు కొట్టేయగల సమర్థుడు అతను. ముఖ్యంగా ప్రపంచ కప్‌ అంటే గాడ్‌ మోడ్‌లోకి మారిపోతాడు ఆ స్టార్ బ్యాటర్. మెగా సమరంలో పరుగుల ఎలా పారించాలో అతడికి బాగా తెలుసు. ఇంత పెద్ద టోర్నీకి తొలిసారి జట్టుకు నాయకత్వం వహిస్తున్నప్పటికీ.. ఎక్కడా ఆ ఒత్తిడి కనిపించలేదు. ఇప్పటికే అర్థమైపోయిందిగా ఎవరా అతడని? అతనెవరో కాదు మన హిట్మ్యాన్ రోహిత్ శర్మ.
అక్టోబర్ 11న జరిగిన మ్యాచ్లో శతకొట్టిన రోహిత్.. 84 బంతుల్లో 131 పరుగులు తీసి.. సచిన్ రికార్డ్ను బ్రేక్ చేయడమే కాకుండా.. 63 బంతుల్లోనే సెంచరీ మార్క్‌ను అందుకుని వరల్డ్ కప్‌లో వేగవంతమైన సెంచరీ చేసిన భారత ప్లేయర్గా రికార్డుకెక్కాడు. ఆస్ట్రేలియాతో జరిగిన తొలి మ్యాచ్లో దురదృష్టవశాత్తూ ఇన్‌స్వింగర్‌కు బలైనప్పటికీ.. ఆ ప్రభావం ఈ మ్యాచ్లో ఎక్కడా చూపించలేదు. బ్యాట్‌తో అఫ్గాన్‌పై ఒక్కసారిగా విరుచుకుపడ్డాడు. ఈ ఒక్క మ్యాచ్తో ఇప్పటికే సచిన్, క్రిస్‌ గేల్‌ రికార్డులతో పాటు పలు రికార్డులను తన తన ఖాతాలో వేసుకున్నాడు.
వరల్డ్ కప్‌ల్లో విధ్వంసం..
Rohit Sharma World Cup Stats : ద్వైపాక్షిక సిరీసుల్లో సారధిగా రోహిత్కు మంచి రికార్డు ఉంది. అయితే, బ్యాటర్‌గా వన్డే ప్రపంచ కప్‌ మెగా టోర్నీల్లో అద్భుతంగా ఆడిన ఈ స్టార్ ప్లేయర్.. ఇప్పుడు ఆడేది మూడో వరల్డ్ కప్‌ అయినా సరే.. ఐదు ప్రపంచకప్‌లు ఆడిన వారికి కూడా సాధ్యం కాని విధంగా ఏడు సెంచరీలను నమోదు చేశాడు. అందుకే, విరాట్ కోహ్లీ లక్ష్య ఛేదనలో కింగ్‌ అయితే.. రోహిత్ 'వరల్డ్ కప్‌ హీరో' అనడంలో ఏ మాత్రం సందేహం లేదు. కేవలం 19 ఇన్నింగ్స్‌ల్లోనే ఏడు శతకాలు బాదడం చూస్తేనే.. అతడి విధ్వంసం ఏస్థాయిలో ఉంటుందో అందరికీ తెలుస్తోంది. ఇందులో మూడు సెంచరీలు లక్ష్యఛేదన సమయంలోనే కావడం విశేషం. ప్రస్తుతం అతడి ఫామ్‌ను చూస్తుంటే ఈ టోర్నీలో శతకాల సంఖ్య 10కి చేరినా మనం అస్సలు ఆశ్చర్యపోనక్కర్లేదు. 2015 వరల్డ్ కప్‌లో ఒకటి, 2019లో ఏకంగా ఐదు సెంచరీలు సాధించాడు.
సిక్స్‌లు అలా కొట్టేందుకు కారణమదే..
Rohit Sharma World Cup Sixes : రోహిత్ శర్మ సిక్స్‌లను అలవోకగా కొడతాడని మనకు తెలుసు. తాజాగా అఫ్గాన్తో జరిగిన మ్యాచ్లోనూ ఐదు సిక్స్‌లు బాదేశాడు. ఇతర బ్యాటర్లతో పోలిస్తే బంతిని కాస్త ముందుగానే అంచనా వేసి షాట్‌ కొట్టడంలో రోహిత్ దిట్ట. అతని అద్భుతమైన టైమింగ్‌ దీనికి కారణం.
