India Vs Pakistan World Cup : భారత్ వేదికగా ఈ ఏడాది అక్టోబర్‌ 5వ తేదీ నుంచి క్రికెట్ వన్డే ప్రపంచకప్‌ ప్రారంభం కానుంది. దేశంలో వివిధ వేదికల్లో జరగనున్న ఈ పోరుకు ఇప్పటికే సన్నాహాలు మొదలయ్యాయి. వరల్డ్ కప్ అంటేనే టీవీలకు అతుక్కుపోయే క్రికెట్ లవర్స్ ఇక చిరకాల భారత్-పాక్ మ్యాచ్ అంటే చాలు కళ్లార్పకుండా చూస్తారు. దాయాదుల పోరు అంత రసవత్తరంగా ఉంటుంది. ఈ క్రమంలో అక్టోబర్‌ 15న భారత్-పాకిస్థాన్ తొలిసారి పోటీపడనుంది. ఇక ఈ మ్యాచ్ను ఆసక్తిగా చూసేందుకు సర్వం సిద్ధం అవుతున్న వేళ క్రికెట్ లవర్స్కు ఐసీసీ ఓ పెద్ద షాక్ ఇవ్వనుంది. తాజా సమాచారం ప్రకారం ఈ మ్యాచ్ను రీషెడ్యూల్ చేసే అవకాశం ఉన్నట్లు వార్తలు వస్తున్నాయి. భద్రతా కారణాల రీత్యా ఈ నిర్ణయం తీసుకోనున్నట్లు సమాచారం.
ఆ తేదీ ఖారారు ?
ఇటీవలే ఐసీసీ విడుదల చేసిన షెడ్యూల్ ప్రకారం.. భారత్-పాక్ మ్యాచ్ అక్టోబర్‌ 15న అహ్మదాబాద్ వేదికగా జరగనుంది. అయితే అదే రోజు గుజరాత్‌ వ్యాప్తంగా నవరాత్రి ఉత్సవాలు ప్రారంభం కానున్నాయి. ఈ నేపథ్యంలో భద్రతా కారణాల దృష్ట్యా మ్యాచ్ తేదీని మార్చాలని భద్రతా సంస్థలు బీసీసీఐకి సూచించినట్లు ఓ ఆంగ్ల పత్రిక కథనంలో పేర్కొంది. ఈ క్రమంలోనే దీనికి సంబంధించి తుది నిర్ణయం తీసుకుంటామని బీసీసీఐ అధికారులు చెప్పినట్లు తెలిపింది.
"మేం దీనిపై మా దగ్గరున్న ఆప్షన్ల గురించి చర్చిస్తున్నాం. త్వరలోనే ఓ నిర్ణయాన్ని తీసుకుంటాం. భారత్, పాక్‌ల మధ్య జరిగే ప్రతిష్ఠాత్మక మ్యాచ్ కోసం భారీగా అభిమానులు అహ్మదాబాద్‌కు తరలివస్తారు. అయితే ఓ పక్క నవరాత్రి ఉత్సవాలు, మరో వైపు మ్యాచ్‌తో తమపై భారం పెరుగుతుందని సెక్యూరిటీ ఏజెన్సీలు మాకు సూచనలు చేశాయి" అని బీసీసీఐ ఉన్నతాధికారులు చెప్పినట్లు ఆ మీడియా పేర్కొంది.
మరోవైపు వరల్డ్ కప్ మ్యాచ్‌లు నిర్వహించే రాష్ట్ర సంఘాలు జులై 27న రాజధాని దిల్లీలో సమావేశం కావాలని బీసీసీఐ కార్యదర్శి జైషా చెప్పినట్లు తెలుస్తోంది. ఇక ఈ సమావేశంలోనే భారత్-పాక్ మ్యాచ్ కొత్త తేదీని నిర్ణయించే అవకాశం ఉన్నట్లు సమాచారం. ఇందులో భాగంగా అహ్మదాబాద్‌లో జరిగే భారత్-పాక్ మ్యాచ్ను ఒక్క రోజు ముందుకు అంటే.. అక్టోబర్‌ 14కు మార్చే అవకాశాలు ఉన్నట్లు వార్తలు వస్తున్నాయి.
ఇక ఈ మ్యాచ్కు ఇప్పటి నుంచే ఓ రేంజ్లో హైప్ క్రియేట్ అయ్యింది. ఈ మ్యాచ్ జరిగే వారంలో.. అహ్మదాబాద్ సహా, సమీప నగరాల్లో లగ్జరీ హోటల్స్ రేట్లు అమాంతం పెరిగిపోయాయి. కొన్ని హోటల్స్లో ఒక రోజు బస చేసేందుకు సుమారు రూ. 80 వేల ఖర్చు చేయాల్సి వస్తుందని సమాచారం. పాక్ ప్రపంచ కప్లో తమ మిగతా మ్యాచ్లను కోల్కతా, చెన్నై, బెంగళూరు, హైదరాబాద్లలో ఆడనుంది.
