Highest Chasings in Asia Cup : ఆసియా క‌ప్ హిస్టరీలో టాప్ ఛేజింగ్​లు.. మూడింట్లో 2 భారత్​వే.. అందులో కోహ్లీ ఇన్నింగ్సే..

Highest Chasings in Asia Cup : ప్రతిష్ఠాత్మకంగా జరిగే ఆసియా కప్​ను మినీ మెగాటోర్నీగా పిలుస్తారు. ఈ టోర్నీలో అగ్రశ్రేణి ఆసియా ఖండపు జట్లు పాల్గొంటాయని తెలిసిందే. అయితే 15 సీజన్​లు పూర్తి చేసుకున్న ఈ టోర్నీ.. ప్రస్తుతం 16 న సీజన్​ పాకిస్థాన్, శ్రీలంక వేదికలుగా జరుగుతోంది. ఈ 16 సీజన్​లలో ఇప్ప‌టిదాకా ఆసియా క‌ప్​లో ప‌లుమార్లు భారీ స్కోర్లు న‌మోద‌య్యాయి. అయినప్పటికీ కొన్ని జ‌ట్లు వాటిని విజ‌య‌వంతంగా ఛేదించ‌గ‌లిగాయి. మరి ఆ ఛేదనల గురించి తెలుసుకుందాం.

Highest Chasings in Asia Cup : క్రికెట్​లో టీ-20 ఫార్మాట్ ప్రారంభమైన తర్వాత ఈ ప్రభావం వన్డే, టెస్టులపై కూడా పడింది. ఫార్మాట్​ ఏదైనా బ్యాటర్లు.. బంతిని బౌండరీ దాటించడమే లక్ష్యంగా పెట్టుకొని ఆడుతున్నారు. ఈ క్రమంలో వన్డేల్లో సైతం దూకుడుగా అడుతూ.. తమ జట్లకు భారీ స్కోర్లు అందిస్తున్నారు. దీంతో అప్పుడప్పడూ వన్డేల్లో 400+ పరుగులు సాధించి.. ప్రత్యర్థులకు సవాల్ విసురుతున్నారు. అయితే అంతటి పెద్ద పెద్ద టార్గెట్​లను కూడా అంతర్జాతీయ క్రికెట్​లో ఆయా జట్లు ఛేదిస్తున్నాయి. అలా ఆసియా కప్​ చరిత్రలో వన్డే ఫార్మాట్​లో ఇప్పటివరకూ జ‌రిగిన కొన్ని విజ‌య‌వంత‌మైన ఛేజింగ్​లు ఎంటో తెలుసుకుందాం.

1. ఇండియా వ‌ర్సెస్ పాకిస్థాన్..
2012 ఆసియా కప్​ భారత్ వర్సెస్ పాకిస్థాన్ మ్యాచ్ ఈ లిస్ట్​లో టాప్​ పొజిషన్​లో ఉంది. ఈ మ్యాచ్​లో భారత్ ఏకంగా.. 330 పరుగుల టార్గెట్​ను ఛేదించింది. స్టార్ బ్యాటర్​ విరాట్ కోహ్లీ.. ఈ మ్యాచ్​లో (183* : 148 బంతుల్లో 22x6; 1x6) కెరీర్​ బెస్ట్​ ఇన్నింగ్స్​తో భారత్ 47.5 ఓవర్లలోనే లక్ష్యాన్ని అందుకుంది. విరాట్​తో పాటు సచిన్ తెందూల్కర్ (52), రోహిత్ శర్మ (68) హాఫ్ సెంచరీలతో రాణించారు.

మొదటగా విరాట్, సచిన్​తో కలిసి రెండో వికెట్‌కు 133 పరుగుల భాగస్వామ్యం నెలకొల్పాడు. ఇక సచిన్ ఔటైన తర్వాత.. విరాట్, రోహిత్​ కలిసి మూడో వికెట్​కు 172 పరుగులు జోడించారు. అంతకుముందు బ్యాటింగ్ చేసిన పాక్.. మహ్మద్ హఫీజ్ (105), నాసిర్ జంషెడ్ (112) శతకాలతో చెలరేగి.. జట్టుకు 329 పరుగుల భారీ స్కోర్ అందించారు.

2. పాకిస్థాన్ వ‌ర్సెస్ బంగ్లాదేశ్
2014 ఆసియా కప్​లో భాగంగా పాకిస్థాన్, బంగ్లాదేశ్ జ‌ట్ల మ‌ధ్య జ‌రిగిన మ్యాచ్​లో రెండో అత్య‌ధిక ఛేజింగ్ న‌మోదైంది. ఈ మ్యాచ్​లో తొలుత బ్యాటింగ్ చేసిన బంగ్లా.. 50 ఓవర్లలో 3 వికెట్ల నష్టానికి 326 పరుగులు చేసి పాక్ ముందు భారీ టార్గెట్​ను ఉంచింది. అనంతరం ఛేదనలో అహ్మద్ షెహ్​జాద్ (103), మహమ్మద్ హఫీజ్ (52) తొలుత రాణించగా.. చివర్లో ఫవాద్ ఆలం (74), షహీద్ అఫ్రిదీ (59 పరుగులు : 25 బంతుల్లో; 2x4, 7x6) చెలరేగడం వల్ల పాకిస్థాన్ 49.5 ఓవర్లలో ఏడు వికెట్లు కోల్పోయి.. విజయతీరాలకు చేరుకుంది. అంతకుముందు టాస్ గెలిచి బ్యాటింగ్ ఎంచుకున్న బంగ్లా బ్యాటర్​లలో ఓపెనర్​ అనముల్ హక్​ (100)తో పాటు.. టాపార్డర్​లో ఇమ్రుల్ కైస్ (59), మోమినుల్ హక్ (51), ముష్ఫికర్ రహీమ్ (51) అర్ధ శతకాలతో రాణించడం వల్ల బంగ్లా భారీ స్కోర్ చేయగలిగింది.

3. ఇండియా వ‌ర్సెస్ శ్రీ‌లంక‌.
ఆసియా కప్​ టాప్​ 3 విజ‌య‌వంత‌మైన ఛేజింగ్​ల్లో రెండు టీమ్ఇండియా పేరిటే ఉన్నాయి. 2008 ఆసియా కప్‌లో శ్రీలంకతో జరిగిన మ్యాచ్‌లో.. భారత్ మూడో అతి పెద్ద లక్ష్యాన్ని ఛేదించింది. ఈ మ్యాచ్​లో భారత్ 309 పరుగుల లక్ష్యాన్ని.. 46.5 ఓవర్లలో 310/4 స్కోర్ సాధించి జ‌య‌కేత‌నం ఎగుర‌వేసింది. ఈ మ్యాచ్​లో టీమ్ఇండియా టాపార్డర్​ గౌతమ్ గంభీర్ (68), వీరేందర్ సెహ్వాగ్ (41), సురేశ్ రైనా (54), ఎంఎస్ ధోనీ (67) అద్భుతంగా రాణించారు.

తర్వాత.. యువరాజ్ సింగ్ (36), రోహిత్ శర్మ (22) చివరి వరకూ క్రీజులో ఉండి భారత్​ను గట్టెక్కించారు. ఇక తొలుత బ్యాటింగ్ చేసిన శ్రీలంక.. 50 ఓవర్లలో 8 వికెట్ల నష్టానికి 308 పరుగులు చేసింది. లంక బ్యాటర్లలో సనత్ జయసూర్య (43), మహేల జయవర్ధనే (50) రూపంలో శుభారంభం ల‌భించింది. త‌ర్వాత చమర కపుగెదర (75), చమర సిల్వా (50) సైతం అర్ధ సెంచరీలతో రాణించారు.