లార్డ్స్ వేదికగా పాకిస్థాన్తో జరిగిన రెండో వన్డేలో (England vs Pakisthan) ఆతిథ్య ఇంగ్లాండ్ జట్టు ఘన విజయం సాధించింది. పాకిస్థాన్పై 52 పరుగుల తేడాతో గెలుపొందింది. దీంతో మూడు వన్డేల సిరీస్ను 2-0తో కైవసం చేసుకుంది స్టోక్స్ సేన. నామమాత్రమైన మూడో మ్యాచ్ మంగళవారం బర్మింగ్హామ్ వేదికగా జరగనుంది.
47 ఓవర్లకు కుదించిన ఆటలో తొలుత బ్యాటింగ్కు దిగిన ఇంగ్లాండ్ 45.2 ఓవర్లలో 247 పరుగులకు ఆలౌటైంది. ఓపెనర్ ఫిల్ సాల్ట్(54 బంతుల్లో 60), జేమ్స్ విన్స్(52 బంతుల్లో 56 పరుగులు), లూయిస్ గ్రెగోరీ(47 బంతుల్లో 40 పరుగులు) రాణించారు. పాకిస్థాన్ బౌలర్లలో హసన్ అలీ 5 వికెట్లతో మెరిశాడు.
అనంతరం లక్ష్య ఛేదనలో పాకిస్థాన్ తడబడింది. 41 ఓవర్లలో 195 పరుగులకు ఆలౌటైంది. సౌద్ షకీల్(77 బంతుల్లో 56) మినహా మిగతా బ్యాట్స్మెన్ విఫలమయ్యారు. ఇంగ్లాండ్ బౌలర్లు సమష్టిగా రాణించారు. గ్రెగోరీ 3, సకిబ్ మహమూద్, ఓవర్టెన్, మట్ పార్కిన్సన్ తలో రెండు వికెట్లతో మెరిశారు.
ఇదీ చదవండి: ఫ్యాన్స్తో క్రికెటర్ కొట్లాట.. కేసు నమోదు!
ఆసీస్ చిత్తు..
గ్రాస్ ఐలెట్ వేదికగా ఆస్ట్రేలియాతో (West Windies vs Australia) జరిగిన రెండో టీ20లో ఆతిథ్య విండీస్ విజయకేతనం ఎగురవేసింది. దీంతో ఐదు టీ20ల సిరీస్లో 2-0తో ముందంజ వేసింది కరీబియన్ జట్టు. తొలుత బ్యాటింగ్కు దిగిన విండీస్ నిర్ణీత ఓవర్లలో 4 వికెట్ల నష్టానికి 196 పరుగుల భారీ స్కోరు సాధించింది. ఆల్రౌండర్ హెట్మేయర్(36 బంతుల్లో 61 పరుగులు), ఆండ్రూ రస్సెల్(8 బంతుల్లో 24 పరుగులు) విధ్వంసం సృష్టించారు. డ్రేన్ బ్రేవో(34 బంతుల్లో 47 పరుగులు), సిమ్మన్స్(21 బంతుల్లో 30 పరుగులు) ఫర్వాలేదనిపించారు. ఆసీస్ బౌలర్లలో హేజిల్వుడ్, అగర్, మిచెల్ మార్ష్ తలో వికెట్ తీసుకున్నారు.
లక్ష్య ఛేదనలో ఫించ్ సేన ఘోరంగా విఫలమైంది. 19.2 ఓవర్లలో 140 పరుగులకే చాప చుట్టేసింది. మిచెల్ మార్ష్(42 బంతుల్లో 54 పరుగులు) ఒక్కడే ఆకట్టుకున్నాడు. కెప్టెన్ ఫించ్ 6 పరుగులకే వెనుదిరిగగా.. మరో ఓపెనర్ మాథ్యూ వేడ్ డకౌటయ్యాడు. హైడేన్ వాల్ష్ 3, కాట్రెల్ 2 వికెట్లతో ప్రత్యర్థిని దెబ్బకొట్టారు. తదుపరి మ్యాచ్ మంగళవారం జరగనుంది.
ఇదీ చదవండి: లంక క్రికెటర్కు కరోనా.. సిరీస్పై అనుమానాలు!
