Ganguly BCCI President: మహిళల ఐపీఎల్పై బీసీసీఐ అధ్యక్షుడు గంగూలీ కీలక ప్రకటన చేశారు. పూర్తిస్థాయి మహిళల ఐపీఎల్ను నిర్వహించడానికి వచ్చే ఏడాది సరైన సమయమని చెప్పుకొచ్చారు. పురుషుల ఐపీఎల్కు దీటుగా ఈ టోర్నీని నిర్వహిస్తామని స్పష్టం చేశారు. అధ్యక్షుడిగా గంగూలీ బాధ్యతలు చేపట్టి 26 నెలలు పూర్తయిన నేపథ్యంలో పీటీఐ వార్తాసంస్థకు ఇచ్చిన ఇంటర్వ్యూలో ఈ వ్యాఖ్యలు చేశారు.
ప్రస్తుతం ఏటా 'ఉమన్స్ టీ20 ఛాలెంజ్' పేరుతో మూడు జట్లతో మినీ టోర్నీను బీసీసీఐ నిర్వహిస్తోంది. అయితే గతేడాది రెండు విడతల్లో పురుషుల ఐపీఎల్ నిర్వహించిన కారణంగా ఈ టోర్నీ జరగలేదు.
నాకు ఆ అవసరం లేదు
ఆటగాళ్ల ఎంపికపై సెలక్షన్ కమిటీని తాను ప్రభావితం చేస్తున్నట్లు వస్తున్న ఆరోపణలను ఖండించారు బీసీసీఐ అధ్యక్షుడు గంగూలీ. ఇటువంటి నిరాధార ఆరోపణలపై తాను ఎవరికీ సమాధానం చెప్పాల్సిన అవసరం లేదన్నారు. బోర్డు అధ్యక్షుడి కన్నా ముందు తాను కూడా ఓ ఆటగాడిని అనే విషయంపై విమర్శకులు మర్చిపోవద్దని చెప్పారు.
"నేను సెలక్షన్ కమిటీ మీటింగ్లో ఉన్నట్లు ఓ ఫొటో సోషల్ మీడియాలో వైరలైంది. దానిపై నేను స్పష్టత ఇవ్వాలనుకుంటున్నాను. అది సెలక్షన్ కమిటీ మీటింగ్కు చెందినది కాదు. ఆ చిత్రంలో ఉన్న జాయింట్ సెక్రటరీ జయేష్ జార్జి అసలు కమిటీ మీటింగ్స్లో పాల్గొనరు."
-సౌరవ్ గంగూలీ, బీసీసీఐ అధ్యక్షుడు
టెస్టు కెప్టెన్పై..
విరాట్ కోహ్లీ టెస్టు కెప్టెన్సీ నుంచి తప్పుకొన్న నేపథ్యంలో తదుపరి కెప్టెన్ ఎవరనే విషయంపై గంగూలీ క్లారిటీ ఇచ్చారు. ఆ విషయంపై సెలక్టర్లతో చర్చిస్తున్నామని అని పేర్కొన్నారు. కెప్టెన్సీ ప్రమాణాలకు తగిన ఆటగాడిని వారు ఎంపిక చేసి త్వరలోనే ప్రకటిస్తామని చెప్పారు.
పుజారా, రహానె భవితవ్యంపై స్పందిస్తూ రంజీలో వారి ప్రదర్శన ఆధారంగా సెలక్టర్లు శ్రీలంకతో సిరీస్కు ఎంపికపై తుది నిర్ణయం తీసుకుంటారని తెలిపారు.
ఇదీ చూడండి : 'బుమ్రాను చూసి ఆశ్చర్యపోయిన కోహ్లీ.. వెంటనే టెస్టుల్లో ఛాన్స్'
