చెన్నై టెస్టులో తాను ఔటైనా విధానంపై అసంతృప్తి వ్యక్తం చేశాడు టీమ్ఇండియా బ్యాట్స్మెన్ ఛెతేశ్వర్ పుజారా. తొలి ఇన్నింగ్స్లో పీకల్లోతు కష్టాల్లో ఉన్న జట్టును కీలక సమయంలో ఆదుకున్న ఈ నయా వాల్.. డామ్ బెస్ బౌలింగ్లో క్యాచ్ ఔట్ అయ్యాడు.
అప్పటికే అర్ధసెంచరీ(73 పరుగులు) చేసి ఊపు మీద కనిపించిన పుజారా.. సెంచరీ చేరువయ్యాడు. స్పిన్నర్ బెస్ వేసిన బంతిని బ్యాక్ఫుట్పై ఫుల్షాట్ ఆడేందుకు ప్రయత్నించాడు. బంతి షార్ట్లెగ్లో ఉన్న పోప్కు తగిలి గాల్లోకి ఎగిరింది. దాన్ని షార్ట్ మిడాన్లో ఉన్న బర్న్స్ ఒడిసి పట్టాడు. దీంతో ఆశ్చరపోవడం పుజారా వంతైంది.
"అలా మాత్రమే ఔట్ అయ్యే అవకాశం ఉన్నట్లుంది. నేను అద్భుమైన షాట్లు ఆడాను. బంతిని సరిగానే అంచనా వేశాను. నా బ్యాటింగ్లో ఎలాంటి టెక్నికల్ పొరపాట్లు లేవు. అయినప్పటికీ ఒక బ్యాట్స్మెన్గా అంతకుమించి చేయడానికి ఏమీ లేదు. ఇలా జరగడం దురదృష్టకరం" అని పుజారా తెలిపాడు.
జట్టు పీకల్లోతు కష్టాల్లో ఉన్నప్పుడు రిషభ్పంత్తో కలిసి 119 పరుగుల భాగస్వామ్యాన్ని నమోదు చేశాడు పుజారా. 'పంత్తో కలిసి ఆడటాన్ని ప్రేమిస్తాను. అతని బ్యాటింగ్ పట్ల సంతోషంగా ఉంది. రిషభ్ ఇంకొన్ని విషయాలు నేర్చుకోవాల్సి ఉంది. సెంచరీ చేసే అవకాశాలను కోల్పోతున్నాడు. దీన్ని నుంచి అతడు నేర్చుకుంటాడని నమ్ముతున్నాను' అని నయావాల్ తెలిపాడు.
ఇదీ చదవండి: 'టోర్నీ నిర్వహణలో భారతీయుల పాత్ర కీలకం'
