దిల్లీలోని అరుణ్ జైట్లీ క్రికెట్ మైదానాన్ని వ్యాక్సినేషన్ కేంద్రంగా ఉపయోగించుకోవాలని.. కేజ్రీవాల్ ప్రభుత్వానికి లేఖ రాసింది దిల్లీ అండ్ డిస్ట్రిక్స్ క్రికెట్ అసోసియేషన్(డీడీసీఏ). ఈ విషయాన్ని రాష్ట్ర క్రికెట్ బోర్డు అధ్యక్షుడు రోహన్ జైట్లీ ధ్రువీకరించారు.
ఐపీఎల్లో భాగంగా మే 2 వరకు మ్యాచ్లకు ఆతిథ్యమిచ్చింది అరుణ్ జైట్లీ స్టేడియం. కరోనా కారణంగా లీగ్ నిరవధిక వాయిదా పడింది. దీంతో మైదానాన్ని టీకా కేంద్రంగా వాడుకోవాలని సూచించింది డీడీసీఏ. దీని ద్వారా రోజుకు దాదాపు 10వేల మందికి టీకా పంపిణీ చేపట్టవచ్చని పేర్కొంది.
"ఒకవేళ టీకా కేంద్రం కోసం దిల్లీ ప్రభుత్వం అన్వేషిస్తున్నట్లైతే అరుణ్ జైట్లీ స్టేడియాన్ని నిస్సందేహంగా వాడుకోవచ్చు. పరిస్థితులు కుదుటపడే వరకు, మైదానంలో క్రికెట్ కార్యకలాపాలు తిరిగి ప్రారంభమయ్యేంత వరకు క్రీడా ప్రాంగణాన్ని ఉపయోగించుకోవచ్చు. రోజుకు దాదాపు పది వేల మందికి ఇది ఉపయోగకరంగా ఉంటుంది."
- రోహన్ జైట్లీ, దిల్లీ క్రికెట్ అసోసియేషన్ అధ్యక్షుడు.
దిల్లీలో 45 ఏళ్లు పైబడిన వారికి 470 కేంద్రాల్లో టీకా పంపిణీ చేపడుతుండగా.. 18-44 ఏళ్ల వారికి 394 సెంటర్లలో వ్యాక్సినేషన్ చేస్తున్నారు. అన్ని వయసుల వారికి కలిపి ఇప్పటివరకు 41.64 లక్షల కరోనా టీకాలు ఇచ్చారు.
ఇదిలా ఉండగా.. దిల్లీలో పాజిటివిటీ రేటు 11 శాతంగా ఉన్నట్లు సీఎం కేజ్రీవాల్ వెల్లడించారు. శనివారం కొత్తగా 6,500 కేసులు వచ్చినట్లు తెలిపారు.
ఇదీ చదవండి: ఇటాలియన్ ఓపెన్: ఫైనల్లోకి జకో.. రఫాతో అమీతుమీ
