ఎన్నో రోజుల పాటు సాగిన క్రికెట్ ప్రపంచకప్ ముగిసింది. ఇంగ్లాండ్ విజేతగా నిలిచింది. టీమిండియా సెమీఫైనల్లోనే నిష్క్రమించింది. కానీ సీజన్లో అత్యధిక పరుగులు చేసిన రోహిత్ శర్మ.. త్వరలో గోల్డెన్ బ్యాట్ అందుకోనున్నాడు. ఈ ఘనతను పొందే మూడో భారత క్రికెటర్గా రికార్డు సృష్టించనున్నాడు.
రోహిత్ కంటే ముందు సచిన్‌ (1996, 2003), రాహుల్‌ ద్రావిడ్‌ (1999) ఈ రికార్డు సాధించారు. ఈ ప్రపంచకప్లో ఐదు సెంచరీలు బాదిన రోహిత్.. 81 సగటుతో 648 పరుగులు చేశాడు. ఒకే సీజన్లో అత్యధిక శతకాలు చేసిన ఆటగాడిగానూ రికార్డు సృష్టించాడు.
తర్వాతి స్థానాల్లో ఆస్ట్రేలియా ఆటగాడు డేవిడ్ వార్నర్‌ (647), బంగ్లాదేశ్‌ ఆల్‌రౌండర్ షకిబ్‌ అల్‌ హసన్‌ (606) ఉన్నారు. రోహిత్‌ను అధిగమించే అవకాశం న్యూజిలాండ్ సారథి కేన్ విలియమ్సన్కు ఫైనల్లో లభించింది. కానీ 30కే ఔటై.. 576 పరుగులు చేసి నాలుగో స్థానంతో సరిపెట్టుకున్నాడు. ఐదు, ఆరు స్థానాల్లో ఇంగ్లాండ్ ఆటగాళ్లు జో రూట్‌ (556), బెయిర్‌స్టో (532) ఉన్నారు.
ఇది చదవండి: 44 ఏళ్లలో రాని కప్పు ఇంగ్లాండ్కు 4 ఏళ్లలో వచ్చింది.. కారణాలివే!
