2015 ప్రపంచకప్లో ఇంగ్లాండ్ నిలవాలంటే బంగ్లాదేశ్పై తప్పక గెలవాల్సిన పరిస్థితి. కానీ 275 పరుగుల లక్ష్య ఛేదనలో 260 పరుగులకే ఆలౌటై మెగాటోర్నీ నుంచి నిష్క్రమించింది. అత్యంత అవమానకర రీతిలో ఇంటిముఖం పట్టింది. అది నాలుగేళ్ల క్రితం.. ప్రస్తుతం పరిస్థితి మారింది. స్వదేశంలో జరుగుతున్న మెగాటోర్నీలో సత్తాచాటి కప్పును కైవసం చేసుకునేందుకు ఒక్క అడుగుదూరంలో ఉంది. నాలుగేళ్లలో ఇంగ్లాండ్లో ఈ మార్పునకు కారణం ఏంటి? ఫైనల్కు చేరడానికి ఇంగ్లీష్ జట్టుకు దోహద పడిన అంశాలేంటి?
ప్రపంచకప్ పరాభవం కసిని పెంచింది...
2015 ప్రపంచకప్లో ఆడిన ఇంగ్లాండ్ జట్టులోని ఐదుగురు ఆటగాళ్లు ప్రస్తుత జట్టులో ఉన్నారు. అప్పుడూ ఆ జట్టు కెప్టెన్ మోర్గానే. అయితే 4 ఏళ్ల క్రితం జరిగిన వరల్డ్కప్ పరాభవం వారిలో కసిని పెంచింది. వరుస విజయాలతో దూసుకెళ్లేలా చేసింది. జట్టులో మార్పులు చేసి ప్రతిభ కలిగిన యువ ఆటగాళ్లకు అవకాశం కల్పించింది యాజమాన్యం.
స్ట్రాస్ పర్యవేక్షణలో రాటుతేలింది..
మాజీ కెప్టెన్ ఆండ్రూ స్ట్రాస్ పర్యవేక్షణలో ఇంగ్లాండ్ రాటుతేలింది. జట్టుకు డైరెక్టర్గా నియమాకం అయిన తర్వాత స్ట్రాస్ చేసిన మొదటి పని.. జట్టు కోచ్ పీటర్ మూర్స్, మెంటర్ కెవిన్ పీటర్సన్ను తొలగించడం. కొత్త కోచ్గా ట్రెవర్ను నియమించి.. జేసన్ రాయ్, బెయిర్ స్టో, జో రూట్, బట్లర్, స్టోక్స్, వోక్స్ లాంటి యువ క్రికెటర్లకు ఎక్కువ అవకాశాలు కల్పించాడు. సంప్రదాయాలకు భిన్నంగా పరిమిత ఓవర్ల క్రికెట్ను దృష్టిలో ఉంచుకుని మ్యాచ్ మలుపుతిప్పే వారిని తీసుకున్నాడు.
13 వన్డే సిరీస్ల్లో 11 విజయం..
2017 జనవరి నుంచి మెగాటోర్నీ ముందువరకు ఇంగ్లాండ్ 13 వన్డే సిరీస్లు ఆడగా కేవలం రెండింటిలోనే పరాజయం చెందింది. వెస్టిండీస్(4-0), ఆస్ట్రేలియా(5-0), టీమిండియా(2-1), పాకిస్థాన్(4-0)లాంటి అగ్రజట్లపై స్వదేశంలో జరిగిన వన్డే సిరీస్ల్లో గెలిచింది.
అయితే శ్రీలంక, ఆస్ట్రేలియాపై జరిగిన మ్యాచ్ల్లో అనూహ్య ఓటములతో వెనకబడింది. బంగ్లా, పాకిస్థాన్ పుంజుకోగా... టీమిండియాతో మ్యాచ్ను తప్పక గెలవాల్సిన పరిస్థితి ఏర్పడింది. భారత్పై నెగ్గి సెమీస్ రేసులో నిలిచింది. అనంతరం చివరి లీగ్ మ్యాచ్ కివీస్పై గెలిచి సెమీస్ బెర్త్ ఖరారు చేసుకుంది.
సెమీస్ మ్యాచ్లో ఆస్ట్రేలియాపై పూర్తి ఆధిపత్యం చెలాయించింది ఇంగ్లాండ్. 8 వికెట్ల తేడాతో నెగ్గి తుదిపోరుకు అర్హత సాధించింది. ఆదివారం జరగనున్న ఫైనల్లో న్యూజిలాండ్తో పోటీపడనుంది. లీగ్లో కివీస్పై పైచేయి సాధించిన ఇంగ్లాండ్ తుదిపోరులోనూ అదే జోరు కొనసాగించాలనుకుంటోంది.
బ్యాటింగ్, బౌలింగ్లో పటిష్ఠం...
ఈ మెగాటోర్నీలో బ్యాటింగ్, బౌలింగ్ రెండింటిలో దుర్భేద్యంగా ఉంది ఇంగ్లాండ్. ఆ జట్టులో టాప్- 5 బ్యాట్స్మెన్ కనీసం ఓ శతకంతో పాటు 250 పరుగులు చేశారు. ఈ టోర్నీలో మరే జట్టులో ఈ ఘనత సాధించిన వారు లేరు. ఈ మెగాటోర్నీలో వీరు 45 సగటుతో 90కి పైగా స్ట్రైక్ రేట్తో సత్తాచాటారు. రూట్(549), బెయిర్ స్టో(496) రెండు శతకాలు చేశారు. ప్రస్తుత ఫామ్ ప్రకారం ఇంగ్లాండ్లో ప్రతీ బ్యాట్స్మెన్ మ్యాచ్ విన్నరే.
బౌలింగ్లోనూ ఇంగ్లీష్ జట్టు తక్కువేం కాదు. క్రిస్ వోక్స్, మార్క్వుడ్, జోఫ్రా ఆర్చర్, లియామ్ ప్లంకెట్ ఆకట్టుకునే ప్రదర్శన చేస్తున్నారు. ఈ నలుగురు బౌలర్లు 56 వికెట్లు తమ ఖాతాలో వేసుకున్నారు. జట్టులోని ఏకైక స్పిన్నర్ ఆదిల్ రషీద్ 11 వికెట్లు తీశాడు. ఆల్రౌండర్ స్టోక్స్ అటు బ్యాటింగ్తో పాటు బౌలింగ్లోనూ రాణిస్తున్నాడు. అతడు 7 వికెట్లు తీశాడు.
44 ఏళ్ల ప్రపంచకప్ చరిత్రలో ఇప్పటివరకు 3 సార్లు ఫైనల్ చేరిన ఇంగ్లీష్ జట్టుకు రిక్త హస్తాలే మిగిలాయి. ప్రస్తుతం నాలుగోసారి తుదిపోరుకు అర్హత సాధించిన ఇంగ్లాండ్ విశ్వవిజేత కావడానికి తహతహలాడుతోంది. ఆదివారం ఫైనల్లో కివీస్పై గెలిచి విజయబావుటా ఎగురవేయాలని భావిస్తోంది.
