దక్షిణాఫ్రికాతో జరిగిన ప్రపంచకప్ మ్యాచ్లో పాక్ ఆటగాడు హారిస్ సోహైల్ అరుదైన రికార్డు సాధించాడు. వరల్డ్కప్ మ్యాచ్లో అత్యధిక స్ట్రైక్ రేట్ నమోదు చేసిన మూడో పాక్ ఆటగాడిగా రికార్డు నెలకొల్పాడు. 59 బంతుల్లో 89 పరుగులు చేసిన సోహైల్ 150.85 స్ట్రైక్ రేట్తో ఆడాడు. ఇందులో 9 ఫోర్లు, 3 సిక్సర్లు ఉన్నాయి.
అంతకుముందు పాక్ మాజీ కెప్టెన్ ఇమ్రాన్ ఖాన్ 1983 ప్రపంచకప్లో శ్రీలంకపై 169.69 స్ట్రైక్ రేట్తో అగ్రస్థానంలో ఉన్నాడు. ఆ మ్యాచ్లో 33 బంతుల్లో 56 పరుగుల చేశాడు ఇమ్రాన్. ఆ తర్వాత ఇంజిమామ్ ఉల్ హఖ్ 1992 మెగాటోర్నీలో 37 బంతుల్లో 60 పరుగుల చేసి రెండో స్థానంలో ఉన్నాడు. 162.16 స్ట్రైక్ రేట్ నమెదు చేశాడు ఇంజిమామ్.
జెర్సీ నెంబర్.. పరుగులు ఒక్కటే..
సఫారీలతో జరిగిన ఈ మ్యాచులో మరో ఘనత సాధించాడు సోహైల్. అతడి జెర్సీ నెంబర్(89).. చేసిన పరుగులు(89) ఒక్కటే కావడం విశేషం.
లార్డ్స్ వేదికగా జరిగిన ఈ మ్యాచ్లో దక్షిణాఫ్రికాపై 49 పరుగుల తేడాతో విజయం సాధించింది పాకిస్థాన్. 309 పరుగుల లక్ష్య ఛేదనలో బరిలో దిగిన ప్రొటీస్ 259 పరుగులకే పరిమితమైంది. హారిస్ సొహైల్, బాబార్ ఆజమ్(69) అర్ధశతకాలతో ఆకట్టుకున్నారు.
ఇది చదవండి: సఫారీలపై పాక్ జయకేతనం- సెమీస్ ఆశలు సజీవం
