భారత జట్టు సీనియర్ ఓపెనర్ శిఖర ధావన్ గాయంపై టీమిండియా ఫీల్డింగ్ కోచ్ శ్రీధర్ స్పందించాడు. ధావన్ కోలుకుని బ్యాటింగ్ చేయగలిగినప్పటికీ... ఫీల్డింగ్లో ఇబ్బందులు ఎదురయ్యే అవకాశముందన్నాడు. ముఖ్యంగా ధావన్ స్లిప్లో ఫీల్డింగ్ చేయడం కష్టమవుతుందని అభిప్రాయపడ్డాడు.
"బంతిని విసరడంలో ఇబ్బంది ఉండకపోవచ్చు. కానీ గాయం ప్రభావం ఫీల్డింగ్, క్యాచ్లు పట్టే సమయంలో కచ్చితంగా ఉంటుంది. ఇన్నింగ్స్ ఆరంభంలో ధావన్ స్లిప్లో ఎక్కువగా ఫీల్డింగ్ చేస్తాడు. ఆ ప్రాంతంలో బంతి చాలా వేగంగా ఫీల్డర్ చేతికి దూసుకెళుతుంది."
--- ఆర్. శ్రీధర్, భారత క్రికెట్ ఫీల్డింగ్ కోచ్.
ఆస్ట్రేలియాతో జరిగిన మ్యాచ్లో ధావన్ 117 పరుగులతో చెలరేగి ఆడాడు. ఆ సమయంలో ధావన్ వేలికి గాయమైన సంగతి తెలిసిందే. గాయం వల్ల ప్రపంచకప్లో ధావన్ స్థానంపై సందిగ్ధత నెలకొంది.
'ఫీల్డింగ్లో బుమ్రా మెరుగుపడ్డాడు'
ప్రస్తుతం ప్రపంచంలో ఉన్న అత్యుత్తమ బౌలర్లలో బుమ్రా ఒకడు. అతడి బౌలింగ్ నైపుణ్యంపై ఎలాంటి సందేహాలు లేవు. కానీ మిగితా జట్టు సభ్యులతో పోలిస్తే బుమ్రా ఫీల్డింగ్ ప్రదర్శన కొంత తక్కువే. ఈ విషయంపై స్పందించిన శ్రీధర్.. ఫీల్డింగ్లో స్టార్ బౌలర్ ఎంతో మెరుగుపడ్డాడని అన్నాడు. తన ప్రదర్శనను మెరుగుపరుచుకోవడానికి బుమ్రా ఎంతో శ్రమిస్తాడని ప్రశంసించాడు శ్రీధర్.
"ఫీల్డింగ్ అంశంలో బుమ్రా ఎంతో శ్రమిస్తాడు. 2016 నుంచి భారత్కు ప్రాతినిధ్యం వహిస్తున్నాడు బుమ్రా. అప్పటి నుంచి ఇప్పటివరకు అతడి ఫీల్డింగ్ మెరుగుపరుచుకోవడానికి ఎంతో కష్టపడ్డాడు."
--- ఆర్. శ్రీధర్, భారత క్రికెట్ ఫీల్డింగ్ కోచ్.
భారత ఆటగాళ్ల ఫీల్డింగ్ ప్రదర్శనపై సంతృప్తిగా ఉన్నట్టు శ్రీధర్ స్పష్టం చేశాడు. రోహిత్, కోహ్లీ, జడేజా, హార్దిక్ వంటి నైపుణ్యమైన ఆటగాళ్లు టీమిండియాకు ప్రాతినిధ్యం వహించడం సంతోషంగా ఉందన్నాడు.
