రాయల్ ఛాలెంజర్స్ బెంగళూరు శిక్షణా శిబిరంలో ఈసారి కొత్త ఉత్తేజం కనిపిస్తుందని ఆ జట్టు స్టార్ బ్యాట్స్మన్ ఏబీ డివిలియర్స్ అన్నాడు. ఆరోన్ ఫించ్, డేల్ స్టెయిన్, క్రిస్ మోరిస్ లాంటి వాళ్ల రాకతో సానుకూల ప్రభావం వచ్చిందని అభిప్రాయపడ్డాడు. జట్టులోని ప్రతి లైనప్కు బ్యాకప్ ఉందని తెలిపాడు.
"ప్రతి సీజన్లో మా జట్టు గురించి చాలా చెప్పాం. కానీ, ఈసారి మాత్రం పూర్తి భిన్నం. ఈ విషయంలో పూర్తి హామీ ఇస్తున్నాను. అంతవరకే మీకు చెప్పగలను. మా జట్టే ఉత్తమమని చెప్పలేను కానీ వర్ణించలేని కొత్త అనుభూతి పొందుతున్నాను. జట్టులోని కొన్ని కాంబినేషన్లకు బ్యాకప్లు ఉన్నాయి. అందుకోసం కెప్టెన్ కోహ్లీతో పాటు కోచ్లు కలిసి ఉత్తమ జట్టును ఎంపిక చేస్తున్నారు. తుది జట్టులో నేను ఉండొచ్చు లేదా నా స్థానంలో పార్థివ్, డేల్ స్టెయిన్ లాంటి ఆటగాళ్లు ఆడొచ్చు. బ్యాటింగ్, బౌలింగ్, ఫీల్డింగ్ అన్ని విభాగాల్లో మార్పులు జరుగుతున్నాయి"
- ఏబీ డివిలియర్స్, ఆర్సీబీ బ్యాట్స్మన్
దీనితో పాటే కెప్టెన్ కోహ్లీని డివిలియర్స్ ప్రశంసించాడు. అతడు జట్టును ముందుండి నడిపిస్తున్నాడని, కరోనా విశ్రాంతి తర్వాత జట్టును తిరిగి గాడిలోకి తెచ్చే సత్తా విరాట్కు ఉందని అభిప్రాయపడ్డాడు.
యూఏఈ వేదికగా సెప్టెంబరు 19 నుంచి నవంబరు 10 వరకు మ్యాచ్లు జరగనున్నాయి. ముంబయి, చెన్నై తొలి మ్యాచ్లో తలపడనున్నాయి. సెప్టెంబరు 21న సన్రైజర్స్ హైదరాబాద్తో రాయల్ ఛాలెంజర్స్ బెంగళూరు తొలి పోరు ఆడనుంది.
