లాక్డౌన్ తర్వాత క్రికెట్లో చాలా మార్పులు జరిగాయి. బయో బబుల్లో ఆడటం, బంతికి ఉమ్మి రుద్దడం నిషేధం లాంటి నిబంధనలు రూపొందించారు. అవి అమల్లోకి రాగానే ప్రస్తుత, మాజీ ఆటగాళ్లు భిన్నాభిప్రాయాలు వ్యక్తం చేశారు. ఇప్పుడు దిగ్గజ సచిన్ కూడా దాని గురించే మాట్లాడాడు. భారత్-ఆస్ట్రేలియా టెస్టు సిరీస్ త్వరలో జరగనున్న నేపథ్యంలో మాస్టర్ చేసిన ఈ వ్యాఖ్యలు ఆలోచింపజేస్తున్నాయి.
"సలైవా నిషేధం, దానికి ఇంతవరకు ప్రత్యామ్నాయం లేకపోవడం వల్ల బౌలర్లు వికలాంగులు అవుతున్నారు. క్రికెట్లో సలైవా, చెమట చాలా ముఖ్యం. అయితే బౌలర్లు చెమటతో పోల్చితే దాదాపు 60 శాతం సలైవాకే ప్రాధాన్యత ఇస్తారు. ఇప్పుడు దానిపైనే నిషేధం విధించారు. దీంతో బౌలర్లు ఏం చేయలేకపోతున్నారు."
-సచిన్, టీమ్ఇండియా మాజీ క్రికెటర్
టెస్టు సిరీస్లో ఆస్ట్రేలియా బ్యాటింగ్ లైనప్ను పడగొట్టాలంటే భారత బౌలర్లు సలైవాకు ప్రత్యామ్నాయం చూసుకోవాలని తెలిపాడు సచిన్. ఈ ఫార్మాట్లో ప్రతిరోజూ ఒకేలా ఉండదని చెప్పిన మాస్టర్.. పరిమిత ఓవర్ల సిరీస్లోని ప్రదర్శనతో టెస్టులను పోల్చిచూడటం సరికాదని అన్నాడు. గతంలో ఏం జరిగిందో వదిలేయాలని, ప్రస్తుతం టెస్టు సిరీస్పైనే దృష్టి సారించాలని సచిన్ భారత ఆటగాళ్లకు సూచించాడు.
ఇటీవల జరిగిన గులాబీ బంతి వార్మప్ మ్యాచ్లో టీమ్ఇండియా బౌలర్లు అదరగొట్టారు. తొలి ఇన్నింగ్స్లో ఆస్ట్రేలియా-ఎ ను 108 పరుగులకే ఆలౌట్ చేసి అబ్బురపరిచారు. మూడు రోజుల పాటు జరిగిన ఈ పోరు డ్రాగా ముగిసింది.
ఇవీ చదవండి:
