క్రికెట్ అభిమానులంతా ప్రస్తుతం ఎంతో ఆసక్తిగా ఎదురు చూస్తున్న ఏకైక టోర్నీ ఐపీఎల్. కరోనా వల్ల దొరికిన సుదీర్ఘ విరామం అనంతరం అంతర్జాతీయ స్థాయిలో జరుగనున్న అతిపెద్ద లీగ్ ఇదే. యూఏఈ వేదికగా సెప్టెంబరు 19న ప్రారంభం కానుంది. బయో సెక్యూర్ వాతావరణంలో ఆడేందుకు క్రికెటర్లందరూ సిద్ధమవుతున్నారు. ఇన్ని నెలల తర్వాత మళ్లీ అభిమాన క్రికెటర్లను మైదానంలో చూడనున్నామనే ఆనందం ఓవైపు ఉన్నాసరే.. లీగ్ నిర్వహణపై అనేక సందేహాలు వస్తున్నాయి.
53 రోజుల పాటు సాగే ఐపీఎల్లో ఆటగాళ్ల సంరక్షణతో పాటు బయట వ్యక్తులతో కలవనీయకుండా బీసీసీఐ ఎలాంటి చర్యలు తీసుకోనుంది? ముఖ్యంగా సీజన్ మధ్యలో ఆటగాడికి కరోనా వస్తే ఏం చేస్తారు? లాంటి ప్రశ్నలు తలెత్తుతున్నాయి. ఈ నేపథ్యంలోనే లీగ్ నిర్వహణ కోసం బీసీసీఐ రూపొందించిన ప్రణాళికలు(ఎస్ఓపీ) ఇవే.
మ్యాచ్ మధ్యలో ఆటగాడికి కరోనా సోకితే ఏం చేస్తారు?
- ఆటగాళ్లు కరోనా బారిన పడకుండా బీసీసీఐ కట్టుదిట్టమైన చర్యలు తీసుకుంటోంది. బయో బబుల్లో ఉన్న క్రికెటర్ లేదా సహాయ సిబ్బందికి పరీక్షల్లో పాజిటివ్గా తేలితే.. వెంటనే వారిని ఐసోలేషన్లో ఉంచుతారు.
- ఎవరైనా వైరస్ లక్షణాలతో కనిపిస్తే, రెండు వారాలపాటు ఐసోలేషన్కు పరిమితం కావాల్సి ఉంటుంది. ప్రత్యేక వైద్య అధికారి వీళ్లను పర్యవేక్షిస్తారు.
- ఐసోలేషన్ పూర్తయిన తర్వాత.. 24 గంటల వ్యవధిలో రెండుసార్లు చేసే పరీక్షల్లో నెగిటివ్ రావాలి. అప్పుడే వారిని తిరిగి బబుల్లోకి అనుమతిస్తారు. తిరిగి శిక్షణ ప్రారంభించే ముందు కార్డియాక్ స్క్రీనింగ్ కూడా చేయనున్నారు.ఐపీఎల్
యూఏఈకి పయనం అప్పుడే
- ఇటీవలే లీగ్ జరుగుతున్నప్పుడు పాటించాల్సిన నిబంధనలను బీసీసీఐ ప్రకటించింది. యూఏఈలో ఐపీఎల్ నిర్వహణకు కేంద్రం కూడా అనుమతినిచ్చింది. ఈ క్రమంలోనే ఫ్రాంచైజీలన్నీ కార్యకలాపాల్లో నిమగ్నమయ్యాయి. ఆగస్టు 20-23 మధ్య ప్రత్యేక విమానాల్లో జట్లన్నీ యూఏఈకి చేరుకోనున్నాయి.
- ఇతర దేశాలకు చెందిన ఆటగాళ్లు నేరుగా యూఏఈకి రానున్నారు. ప్రయాణానికి వారం ముందు వారందరికీ పరీక్షలు జరుపుతారు. నెగిటివ్ నిర్ధరణ అయిన క్రికెటర్లు లీగ్లో భాగం కానున్నారు.
- యూఏఈ విమానాశ్రయంలో అడుగుపెట్టిన వెంటనే ఆటగాళ్లు, సిబ్బందికి కరోనా పరీక్షలు జరపనున్నారు. అనంతరం ఏడు రోజుల పాటు హోటళ్లలో క్వారంటైన్లో ఉండనున్నారు. ఆ సమయంలో మరో మూడుసార్లు కొవిడ్ పరీక్షలు చేస్తారు. వీటిన్నింటిని దాటుకొని వచ్చినవారే బయో సెక్యూర్ వాతావరణంలోకి అడుగుపెడతారు.
- లీగ్ జరిగినన్ని రోజులు ఆటగాళ్లు వేరొకరిని కలిసేందుకు, ఎక్కడికైనా వెళ్లేందుకు అనుమతి లేదు. ఒకవేళ ఎవరైనా సరే నిబంధనలు అతిక్రమిస్తే.. బోర్డు ఆగ్రహానికి గురి కాక తప్పదు.
