వెస్టిండీస్ విధ్వంసకర బ్యాట్స్‌మన్‌, యూనివర్స్‌ బాస్‌ క్రిస్గేల్ ఆట గురించి తెలియని క్రికెట్ ప్రియులు ఉండరు. అలాంటి ఆటగాడు జాతి వివక్ష ఎదుర్కొన్నట్లు తాజాగా వెల్లడించాడు. అగ్రరాజ్యంలో నల్లజాతి అమెరికన్‌ జార్జి ఫ్లాయిడ్‌ మృతికి సంతాపం తెలిపిన ఈ విండీస్ ప్లేయర్... అనంతరం జాతి వివక్షపై వ్యాఖ్యలు చేశాడు. అన్ని క్రీడల్లాగే క్రికెట్లోనూ వర్ణ వివక్ష ఉందని చెప్పాడు. అయితే ఎవరూ తనకి ఇబ్బందులు సృష్టించారన్న దానిపై స్పష్టత ఇవ్వలేదు. కానీ ఓ గ్లోబల్ టీ20 లీగ్లోనే ఆ అవమానం ఎదుర్కొన్నట్లు చెప్పాడు.
" క్రికెట్ టోర్నీల్లో భాగంగా వివిధ దేశాల్లో పర్యటించాను. ఆ సమయంలో నా రంగు కారణంగా వివక్షతను ఎదుర్కొన్నాను. నల్ల జాతీయులు కూడా అందరిలాంటి వారే. మమ్మల్ని ద్వేషించొద్దు. నలుపు అనేది బలం, నలుపే గర్వకారణం" అని గేల్ చెప్పాడు. ప్రస్తుతం 'బ్లాక్ లివ్స్ మ్యాటర్','ఐ కాంట్ బ్రీత్' నినాదాలతో అగ్రరాజ్యంలో ఆందోళనలు జరుగుతున్నాయి.
ఇదీ చూడండి: క్రికెటర్ ఆర్చర్పై వర్ణ వివక్ష.. కివీస్ బోర్డు క్షమాపణలు
