ఆస్ట్రేలియా మాజీ క్రికెటర్ షేన్ వాట్సన్ తన ఆల్టైమ్ టాప్-5 టీ20 బౌలర్ల జాబితాలో భారత పేసర్ జస్ప్రీత్ బుమ్రాకు చోటు కల్పించాడు. బుమ్రాతో పాటు, శ్రీలంక బౌలర్ మలింగ, పాక్ మాజీ ఆల్రౌండర్ షాహిద్ అప్రిది, వెస్టిండీస్ ఆటగాళ్లు డ్వేన్ బ్రావో, సునీల్ నరైన్ ఈ జాబితాలో ఉన్నారు. ఇందుకు సంబంధించిన వీడియోను టీ20 స్టార్ స్పోర్ట్స్ యూట్యూబ్ ఛానెల్లో పోస్ట్ చేశాడు వాట్సన్.
"నా టాప్ ఐదుగురు టీ20 బౌలర్లలో మొదటి వాడు మలింగ.. అతని యార్కర్ బౌలింగ్ ఇంతకు ముందెన్నడూ చూడనిది. భవిష్యత్తులో ఇలాంటి బౌలర్ పుట్టడం కష్టమే. రెండో స్థానం దక్కించుకున్న వ్యక్తి అఫ్రిది. ప్రస్తుతం అతని బౌలింగ్ గురించి మాత్రమే మాట్లాడుతున్నా. టీ20ల్లో అత్యుత్తమ బౌలర్లలో ఇతను ఒకడు."
షేన్ వాట్సన్, ఆసీస్ మాజీ క్రికెటర్
టీమ్ఇండియా పేసర్ బుమ్రాను ప్రశంసించిన వాట్సన్.. అతని ప్రదర్శన అసాధారణమైనదని.. భవిష్యత్తులో అద్భుతమైన కెరీర్ ఉన్నవాడని పేర్కొన్నాడు. టీ20 క్రికెట్లో 500 వికెట్లు తీసిన తొలి బౌలర్గా రికార్డు సాధించిన వెస్టిండీస్ బౌలర్ బ్రావోను తన జాబితాలో చేర్చాడు వాట్సన్. నరైన్ను కూడా అద్భుతమైన బౌలింగ్ నైపుణ్యం కలిగిన వ్యక్తిగా పేర్కొన్నాడు.
