కరోనా వైరస్ కారణంగా దొరికిన ఖాళీ సమయాన్ని సద్వినియోగం చేసుకుంటున్నారు క్రికెటర్లు. ఇలాంటి సమయంలో టీమ్ఇండియా మాజీ క్రికెటర్ వసీం జాఫర్ తన ఆల్టైమ్ ఎలెవన్ అంటూ ఓ జట్టును ప్రకటించాడు. అత్యుత్తమ ఆటగాళ్లతో ఓ వన్డే జట్టును తయారు చేశాడు.
ఈ జట్టులో ఓపెనర్లుగా సచిన్ తెందూల్కర్, రోహిత్ శర్మలకు చోటు కల్పించాడు. అలాగే మూడులో వెస్టిండీస్ దిగ్గజం వివి రిచర్డ్స్, నాలుగులో టీమ్ఇండియా సారథి విరాట్ కోహ్లీలను ఎంపిక చేశాడు. మిడిలార్డర్లో దక్షిణాఫ్రికా క్రికెటర్ ఏబీ డివిలియర్స్, ఇంగ్లాండ్ ఆల్రౌండర్ బెన్ స్టోక్స్లను తీసుకున్నాడు. ఇక కెప్టెన్గా, కీపర్గా ధోనీకి బాధ్యతలు అప్పగించాడు.
బౌలర్లలో పాకిస్థాన్ స్వింగ్ మాంత్రికుడు వసీం అక్రమ్, విండీస్ మాజీ పేసర్ జోల్ గార్నర్, ఆసీస్ మాజీ బౌలర్ మెక్గ్రాత్లకు చోటు కల్పించాడు. స్పిన్నర్ కోటాలో సక్లయిన్ ముస్తాక్, షేన్ వార్న్లకు అవకాశం ఇచ్చాడు.
అయితే ఆసీస్కు ఎన్నో మరపురాని విజయాలనందించిన రికీ పాంటింగ్ను 12వ ఆటగాడిగా ఎంపిక చేయడం గమనార్హం.
