కోల్కతా చరిత్రాత్మక టెస్టు (2001 మార్చి)కు 20 ఏళ్లవుతున్నా ఆ జ్ఞాపకాలు ఇప్పటికీ తాజాగానే ఉన్నాయని మాజీ క్రికెటర్ వీవీఎస్ లక్ష్మణ్ తెలిపాడు. అప్పటి విజయం ప్రత్యేకమైనది అయినప్పటికీ.. ఇటీవల ఆస్ట్రేలియాలో టీమ్ఇండియా నమోదు చేసిన విజయాలు అంతకంటే ప్రత్యేకమని వెల్లడించాడు.
"కోల్కతా టెస్టు ప్రారంభానికి ముందు స్టీవ్ వా సారథ్యంలోని ఆస్ట్రేలియా జట్టు ముంబయిలో మూడ్రోజుల్లోనే మ్యాచ్ను ముగించి 16 వరుస విజయాల రికార్డును సమం చేసింది. ఈ టెస్టులో తొలి రోజు హర్భజన్ సింగ్ హ్యాట్రిక్ తీసినా.. మేం ఫాలోఆన్ ఉచ్చులో చిక్కుకున్నాం. మ్యాచ్ పూర్తిగా మలుపు తిరగడంలో భజ్జీ, ద్రవిడ్, నేను కీలకపాత్ర పోషించినా.. విజయానికి కారణాలు సమష్టి కృషి.. జట్టు స్ఫూర్తే."
-వీవీఎస్ లక్ష్మణ్, మాజీ క్రికెటర్.
"మైదానంలో ద్రవిడ్, నేనే కాదు జట్టంతా మాతోనే ఉంది. ఈడెన్ గార్డెన్స్లోని ప్రేక్షకులంతా మద్దతుగా నిలిచారు. ఈడెన్ నా ఒక్కడికే కాదు టీమ్ఇండియాకు దశాబ్దాలుగా కలిసొచ్చిన వేదిక. ఎప్పుడు మ్యాచ్ జరిగినా అభిమానులు పెద్ద సంఖ్యలో స్టేడియానికి వస్తారు. తమ అభిమాన ఆటగాడు లేదా జట్టు సత్తాచాటాలని కోరుకుంటారు. మూడో రోజు సచిన్ తెందుల్కర్, సౌరవ్ గంగూలీ ఔటవగానే స్టేడియం నుంచి చాలా మంది వెళ్లిపోయారు. కాని నేను, ద్రవిడ్ మంచి భాగస్వామ్యం నెలకొల్పామని తెలియగానే వెనక్కి పరుగెత్తుకొచ్చారు." అని లక్ష్మణ్ గత జ్ఞాపకాలను గుర్తు చేసుకున్నారు.
ఆ టెస్టులో ట్రిపుల్ సెంచరీ చేజారినందుకు చింతిస్తున్నారా? అని చాలామంది అడిగారు.. అస్సలు కాదన్నదే ఎప్పటికీ నా సమాధానమని లక్షణ్ తెలిపాడు. జట్టు గెలవనప్పుడు వ్యక్తిగత ప్రదర్శనకు పెద్దగా విలువ ఉండదని అభిప్రాయపడ్డాడు. ఆఖరి రోజు ఆటలో వేగంగా పరుగులు రాబట్టి ఇన్నింగ్స్ను డిక్లేర్ చేయలన్నది వ్యూహం.. ఆ క్రమంలోనే ఔట్ అయ్యుండొచ్చని స్పష్టం చేశాడు. ఒకవేళ 300 పరుగులు చేసి.. ఆసీస్ ఎలాగోలా మ్యాచ్ను డ్రా చేసుంటే ప్రయోజనం ఉండేది కాదని పేర్కొన్నాడు.
"భారత్-ఆసీస్ టెస్టు క్రికెట్ సంప్రదాయానికి తగ్గట్లుగా ఇటీవల అద్భుతమైన సిరీస్ను చూశాం. నా దృష్టిలో మెల్బోర్న్, గబ్బాలలో విజయాలు ఈడెన్ కంటే ఎక్కువ ప్రత్యేకం. బ్రిస్బేన్లో 30 ఏళ్లకు పైగా ఓటమి ఎరుగని రికార్డుతో ఆసీస్ నాలుగో టెస్టులో బరిలో దిగింది. టీమ్ఇండియా మాత్రం విరాట్ కోహ్లీ, ప్రథమ శ్రేణి బౌలర్లు లేకుండా పాల్గొంది. అలాంటి పరిస్థితుల్లో నిర్ణయాత్మక పోరులో నెగ్గడం.. యువ ఆటగాళ్లు తలా ఓ చేయి వేయడం నిజంగా అద్భుతమని" విజయం సాధించిన జట్టును కీర్తించాడు.
ఇదీ చదవండి: ఖతార్ ఓపెన్: క్వార్టర్ ఫైనల్లోనే ఫెదరర్ ఓటమి
