టెస్టుల్లో టీమిండియాను వెనక్కు నెట్టి అగ్రస్థానాన్ని కైవసం చేసుకుంది ఆస్ట్రేలియా. ఈ సందర్భంగా మాట్లాడిన ఆ జట్టు కోచ్ జస్టిన్ లాంగర్.. భారత్ను వారి దేశంలో ఓడించడమే తమ లక్ష్యమని అన్నారు. అయితే ఇది అంత సులభమైన విషయం కాదని అభిప్రాయపడ్డారు.
దీనితో పాటే ప్రపంచ టెస్టు ఛాంపియన్షిప్ గెలవడం, అంతిమ లక్ష్యంగా నిర్ణయించుకున్నామని లాంగర్ అన్నారు. షెడ్యూల్ ప్రకారం ఈ ఏడాది చివర్లో ఆస్ట్రేలియాలో ఆ జట్టుతో భారత నాలుగు టెస్టులు ఆడనుంది. అంతకు ముందు 2018-19 మధ్య జరిగిన ఆసీస్ టెస్టు పర్యటనలో రికార్డు సృష్టించింది కోహ్లీసేన. 2-1తో సిరీస్ గెల్చుకుని, 71 ఏళ్ల తర్వాత అక్కడ టెస్టు సిరీస్ గెల్చుకున్న తొలి ఆసియా జట్టుగా నిలిచింది.
నిన్న(శుక్రవారం) విడుదల చేసిన టెస్టు ర్యాంకింగ్స్లో ఆసీస్ 116 పాయింట్లతో ఉండగా, న్యూజిలాండ్(115), భారత్(114) తర్వాతి స్థానాల్లో ఉన్నాయి. 2016 నుంచి అగ్రస్థానంలో కొనసాగుతూ వస్తున్న టీమిండియా.. ఐసీసీ వార్షిక లెక్కల ప్రకారం, మే 2019 నుంచి పరిగణించిన ఫలితాల వల్ల మూడో స్థానానికి పడిపోయింది.
