టీమ్ఇండియా క్రికెటర్ల అంటే ప్రపంచవ్యాప్తంగా విపరీతమైన క్రేజ్. కోహ్లీ, ధోనీ, రోహిత్ శర్మ తదితరులు ఆటలోనే కాకుండా సంపాదనలోనూ యమస్పీడ్ చూపిస్తున్నారు. వారికి మేం తక్కువ కాదంటూ భారత మహిళా క్రికెటర్లు తమ బ్రాండ్ వాల్యూను పెంచుకుంటున్నారు. అలాంటి వారిలోని ఓ ఐదుగురు విశేషాలే ఈ కథనం.
ఈ ఏడాది ఫిబ్రవరిలో ఆస్ట్రేలియాలో జరిగిన మహిళల టీ20 ప్రపంచకప్లో భారత క్రికెటర్లు అదరగొట్టారు. అద్భుతమైన ప్రదర్శనతో ఫైనల్కు చేరినా, తుదిమెట్టుపై బోల్తా పడ్డారు. అయినప్పటికీ తమ ఆటతో చాలా గుర్తింపు తెచ్చుకున్నారు. వీరిలో షెఫాలీ వర్మ, జులాన్ గోస్వామి, పూనమ్ యాదవ్, స్మృతి మందణ్న తదితరులు ఉన్నారు. అయితే వీరిలో ఎక్కువగా ఆర్జించే ఐదుగురు భారత మహిళా క్రికెటర్ల గురించి తెలుసుకుందాం.
1) మిథాలీ రాజ్
మహిళల క్రికెట్లో స్టార్ బ్యాట్స్మన్ మిథాలీ రాజ్. ఆర్జనలోనూ టాప్లోనే ఉంది. బీసీసీఐ కాంట్రాక్ట్ ప్రకారం గ్రేడ్ 'బీ'లో ఉన్న ఈమెకు, ఏడాదికి రూ.30 లక్షలు దక్కుతుంది. దీనితోపాటే ప్రజాదరణ కలిగిన పెద్ద బ్రాండ్లు అలెన్ సోలీ, అమెరికన్ టూరిస్టర్, నెక్స్ట్ జెన్, ఫిట్నెస్ స్టూడియో, రాయల్ ఛాలెంజ్లకు ప్రచారకర్తగా వ్యవహరిస్తోంది.
ప్రస్తుతం భారత మహిళా వన్డే, టెస్టు జట్లకు నాయకత్వం వహిస్తోంది. వన్డేల్లో 189 మ్యాచ్ల్లో టీమ్ఇండియాకు ఆడి, 50.64 సగటుతో 7000కు పైగా పరుగులు చేసింది. 10 టెస్టుల్లో 16 ఇన్నింగ్స్లు ఆడి, 51 సగటుతో 663 పరుగులు చేసింది.
2) హార్మన్ప్రీత్ కౌర్
ఇటీవలే జరిగిన టీ20 ప్రపంచకప్లో భారత్ ఫైనల్కు చేరడంలో కెప్టెన్ హర్మన్ప్రీత్ కౌర్ కీలకపాత్ర పోషించింది. ప్రస్తుతం మన జట్టుకు సారథిగా వ్యవహరిస్తూనే, టీ20 లీగుల్లో సిడ్నీ థండర్స్ ఉమెన్, సూపర్ నోవా జట్లకు కెప్టెన్గా బాధ్యతలు నిర్వర్తిస్తోంది.
హర్మన్ప్రీత్.. బీసీసీఐ కాంట్రాక్ట్ల్లో గ్రేడ్ 'ఏ' కేటగిరీలో ఉంటూ, ఏడాదికి రూ.50 లక్షలు సంపాదిస్తోంది. దీంతోపాటే ఆమె వాడే బ్యాట్ను సియాట్ స్పాన్సర్ చేస్తోంది. ఐటీసీకి సంబంధించిన నేచురల్-బీ అనే పండ్ల రసాలకు బ్రాండ్ అంబాసిడర్గా వ్యవహరిస్తూ సంపాదిస్తోంది.
తన కెరీర్లో ఇప్పటివరకు 114 టీ20ల్లో 2000కు పైగా పరుగులు చేయడమే కాకుండా, 29 వికెట్లను పడగొట్టింది.
3) స్మృతి మందణ్న
మహిళల క్రికెట్లో ఆటతోనే కాకుండా అందంతోనూ అలరిస్తోంది స్మృతి మందణ్న. 2017 మహిళల ప్రపంచకప్లోని ప్రదర్శనతో వెలుగులోకి వచ్చింది. గ్రేడ్ 'ఏ' కేటగిరీలో ప్రస్తుతమున్న ఈమె.. ఏడాదికి రూ.50 లక్షలు ఆర్జిస్తోంది. చెల్లిస్తున్నారు. దీంతో పాటు రెండు బ్రాండ్లకు ప్రచారకర్తగా వ్యవహరిస్తోంది. ఈమె బ్యాట్ స్పాన్సర్గా హీరో మోటోకార్ప్ వ్యవహరిస్తోంది. రెడ్ బుల్ ఎనర్జీ డ్రింక్కు బ్రాండ్ అంబాసిడర్గా ఉంది.
కెరీర్లో 2 టెస్టులు, 51 వన్డేలు, 75 టీ20లకు భారత్ తరఫున ఆడిన స్మృతి.. ప్రస్తుతం భారత జట్టుకు వైస్ కెప్టెన్గా ఉంది. టీ20 లీగ్ల్లో ఉమెన్స్ ఛాలెంజ్, మహిళల బిగ్ బాష్ లీగ్లోనూ ఆడుతోంది.
4) పూనమ్ యాదవ్
ఇటీవలే టీ20 ప్రపంచకప్లో పాల్గొని, తన బౌలింగ్తో ప్రత్యర్థుల వెన్నులో భయం పుట్టించింది పూనమ్ యాదవ్. టోర్నీ ఆరంభమ్యాచ్ నుంచే తన స్పిన్ మాయాజాలంతో వికెట్లను పడగొట్టింది. బీసీసీఐ గ్రేడ్ 'ఏ' కేటగిరీలో ఉన్న ఈమె.. ఈ కాంట్రాక్ట్ ద్వారా ఏడాదికి రూ.50 లక్షలు అందుకుంటోంది. భవిష్యత్లో ఆమెను పలు బ్రాండ్లు ప్రచారకర్తగా నియమించుకునేందుకు ఉత్సాహం చూపిస్తున్నాయి పలు సంస్థలు.
5) జులాన్ గోస్వామి
సీనియర్ పేసర్ జులాన్ గోస్వామి.. ఇప్పటికే భారత్ మహిళా క్రికెట్లో ఎన్నో మైలురాళ్లు అందుకుంది. ప్రస్తుతం గ్రేడ్ 'బీ' కాంట్రాక్ట్తో, ఏడాదికి రూ.30 లక్షలు, బీసీసీఐ నుంచి అందుకుంటోంది.
తన కెరీర్లో 10 టెస్టులు, 182 వన్డేలు, 68 టీ20ల్లో ఆడింది జులాన్. వన్డేల్లో 3.28 ఎకానమీ రేట్తో 225 వికెట్లను సాధించింది.
ఇదీ చూడండి... ధోనీ భార్యను తెగ ఇబ్బంది పెట్టిన చాహల్!
