అంతర్జాతీయ క్రికెట్కు వీడ్కోలు పలుకుతూ నిర్ణయం తీసుకున్నాడు టీమ్ఇండియా ఆల్రౌండర్ యూసఫ్ పఠాన్. 2007 టీ20 ప్రపంచకప్ ఫైనల్తో జట్టులోకి ఎంట్రీ ఇచ్చిన పఠాన్.. తర్వాత 2011 ప్రపంచకప్లో విజేతగా నిలిచిన జట్టులోనూ సభ్యుడిగా ఉన్నాడు. తర్వాత భారత జట్టు ఎన్నో విజయాల్లో పాలుపంచుకున్న ఇతడు తన సోదరుడు ఇర్ఫాన్ పఠాన్తో 2007 టీ20 ప్రపంచకప్లో కలిసి ఆడాడు. తద్వారా ప్రపంచకప్ విజేతగా నిలిచిన భారత జట్టుకు ప్రాతినిధ్యం వహించిన తొలి సోదరుల జోడీగా రికార్డులకెక్కారు యూసఫ్-ఇర్ఫాన్. ఇర్ఫాన్ గతేడాది రిటైర్మెంట్ ప్రకటించాడు. కాగా, ఇప్పటివరకు వరల్డ్కప్ జట్టుకు ప్రాతనిధ్యం వహించిన సోదరులు మరికొందరూ ఉన్నారు. వారెవరో చూద్దాం.
స్టీవ్-మార్క్ వా
ప్రపంచ క్రికెట్లో ఎల్లకాలం గుర్తిండిపోయే సోదరులుగా నిలిచారు ఆస్ట్రేలియాకు చెందిన స్టీవ్ వా-మార్క్ వా. వీరిద్దరూ 1992, 96, 99 ప్రపంచకప్లకు ప్రాతినిధ్యం వహించారు. 1999లో స్టీవ్ వా సారథ్యం వహించిన ఆసీస్ జట్టు విజేతగా నిలిచింది. 398 పరుగులతో ఈ టోర్నీలో అత్యధిక పరుగులు చేసిన ఆటగాళ్ల జాబితాలో రెండో స్థానంలో నిలిచాడు స్టీవ్ వా. రాహుల్ ద్రవిడ్ మొదటి స్థానంలో ఉన్నాడు. మార్క్ వా 375 పరుగులతో నాలుగో స్థానం కైవసం చేసుకున్నాడు.
మైఖెల్-డేవిడ్ హస్సీ
జాతీయ జట్టులోకి ఆలస్యంగా ఎంట్రీ ఇచ్చిన సోదరులు మైఖెల్ హస్సీ, డేవిడ్ హస్సీ. వీరిద్దరూ ఆస్ట్రేలియా జట్టుకు 2011 ప్రపంచకప్లో ప్రాతినిధ్యం వహించారు. కానీ ఈ టోర్నీలో ఆస్ట్రేలియా క్వార్టర్ ఫైనల్లో టీమ్ఇండియా చేతిలో ఓడిపోయి ఇంటిముఖం పట్టింది. కానీ 2007 ప్రపంచకప్ విజేతగా నిలిచిన జట్టులో మైఖేల్ హస్సీ సభ్యుడిగా ఉన్నాడు. వీరిద్దరూ 2013లో తమ చివరి మ్యాచ్ ఆడారు.
బ్రెండన్-నాథన్ మెక్కలమ్
న్యూజిలాండ్కు చెందిన ఈ సోదరులు 2011, 2015 ప్రపంచకప్ జట్టులో సభ్యులుగా ఉన్నారు. కానీ 2015 వరల్డ్కప్లో నాథన్ మెక్కలమ్ టోర్నీ మొత్తం బెంచ్కే పరిమితమయ్యాడు. మొత్తంగా బ్రెండన్ నాలుగు ప్రపంచకప్లకు ప్రాతనిధ్యం వహించగా, నాథన్ రెండు మెగాటోర్నీల్లో ఆడాడు.
ఉమర్-కమ్రన్ అక్మల్
పాకిస్థాన్కు చెందిన ఉమర్ అక్మల్, కమ్రన్ అక్మల్ సోదరులు 2011 ప్రపంచకప్ జట్టులో చోటు సంపాదించారు. ఈ టోర్నీలో సెమీఫైనల్లో భారత్ చేతిలో ఓడి ఇంటిముఖం పట్టింది పాక్. అప్పటికే కమ్రన్ సీనియర్ ఆటగాడిగా కొనసాగుతుండగా, ఉమర్ అప్పుడే జట్టులోకి వచ్చాడు. వీరి మరో సోదరుడు అద్నన్ అక్మల్ కూడా 21 వన్డేలు, 5 టెస్టులకు ప్రాతనిధ్యం వహించాడు. కానీ ప్రపంచకప్ మ్యాచ్ మాత్రం ఆడలేకపోయాడు.
రిచర్డ్-డేల్-బెర్రీ హాడ్లీ
ఇంగ్లాండ్కు చెందిన ఈ ముగ్గురు హడ్లీ సోదరులు 1975లో జరిగిన మొట్టమొదటి 60 ఓవర్ల ప్రపంచకప్కు ప్రాతనిధ్యం వహించారు. ఈ ముగ్గురు కలిసి కేవలం ఒక మ్యాచ్ మాత్రమే ఆడారు. ఇందులో రిచర్డ్ హాడ్లీ లెజెండరీ క్రికెటర్గా ఎదిగాడు. ఈయన కెరీర్లో 86 టెస్టులు, 115 వన్డేలు ఆడి జట్టుకు ఎన్నో మరపురాని విజయాలను అందించాడు.
