భారత్-బంగ్లాదేశ్‌ మధ్య చారిత్రక డే/నైట్ టెస్టు ఈడెన్ గార్డెన్స్లో ఈనెల 22న ప్రారంభం కానుంది. బీసీసీఐ అధ్యక్షుడు సౌరభ్‌ గంగూలీ.. ఈ మ్యాచ్కు సంబంధించిన మస్కట్స్‌ను ఆదివారం ఆవిష్కరించాడు. ఈ సందర్భంగా మాట్లాడుతూ.. సంప్రదాయ టెస్టు క్రికెట్‌పై ఆసక్తి పెంచేందుకు కొత్త పద్ధతులను ప్రవేశపెట్టాల్సిన అవసరముందని అన్నాడు. శుక్రవారం నుంచి మొదలయ్యే ఈ మ్యాచ్కు సంబంధించిన తొలి మూడు రోజుల టికెట్లు అప్పుడే అమ్ముడుపోయాయని చెప్పాడు.
"ముందుకే సాగే తీరిదే. టెస్టు క్రికెట్‌లో కొత్త పద్ధతులను తీసుకురావాలి. ప్రపంచవ్యాప్తంగా ఇది జరుగుతుంది. ఎక్కడో ఒకచోట ప్రారంభం కావాల్సిందే. క్రికెట్‌ పరంగా భారత్ చాలా పెద్ద దేశం. కాబట్టి నూతన పద్ధతులను ప్రవేశ పెట్టాల్సిన అవసరం ఉంది."
-గంగూలీ, బీసీసీఐ అధ్యక్షుడు
దాదా.. బంగాల్‌ క్రికెట్‌ సంఘానికి(కాబ్) అధ్యక్షుడిగా ఉన్న సమయంలో భారత్, పాకిస్థాన్‌ల మధ్య జరగాల్సిన ప్రపంచకప్‌ మ్యాచ్‌ను ధర్మశాలకు బదులు కోల్‌కతాకు తీసుకొచ్చాడు. ఈ విషయంపై గంగూలీ స్పందించాడు.
"భారత్, పాకిస్థాన్‌ల మధ్య పోటీ అంటే ప్రపంచంలో ఎక్కడైనా అభిమానులు వస్తారు. ఆ మ్యాచ్ గురించి ప్రకటిస్తే చాలు, స్టేడియం మొత్తం నిండిపోతుంది. కానీ అసలు పరీక్ష ఈ డే/నైట్ టెస్టు రూపంలో ఎదురుకాబోతుంది. టెస్టు క్రికెట్‌కు అభిమానులను తీసుకురావడం అంత తేలిక కాదు. అయినా తొలి మూడు రోజుల కోసం ఒక్కో రోజు 65 వేల మంది చొప్పున అభిమానులు వస్తున్నారు. ఇది సంతృప్తి చెందాల్సిన విషయం."
-గంగూలీ, బీసీసీఐ అధ్యక్షుడు
టీమిండియా సారథి విరాట్ కోహ్లీ.. తొలిరోజు బరిలో దిగేటపుడు ప్రేక్షకుల్ని చూసి సంతోషిస్తాడని గంగూలీ అన్నాడు. తొలి మూడు రోజులు అభిమానులతో స్టేడియం హోరెత్తిపోతుందని చెప్పాడు.
ఇవీ చూడండి.. బౌల్ట్, కులకర్ణిలను తీసుకుంది అందుకే: జహీర్ఖాన్
