లాక్డౌన్ కారణంగా క్రికెట్ మ్యాచ్లు వాయిదా పడ్డాయి. ఆటగాళ్లకు మంచి విరామం దొరికింది. ఈ సమయంలో సామాజిక మాధ్యమాల్లో బిజీగా గడుపుతున్నారు క్రికెటర్లు. ఇంటర్వ్యూలు, చిట్చాట్ల్లో పాల్గొంటున్నారు. పాకిస్థాన్ మాజీ పేసర్ షోయబ్ అక్తర్ కూడా యూట్యూబ్లో పలు విషయాలను పంచుకుంటున్నాడు. తాజాగా తన ఇన్స్టాగ్రామ్లో బీసీసీఐ అధ్యక్షుడు, టీమ్ఇండియా మాజీ సారథి సౌరభ్ గంగూలీ ఫొటో షేర్ చేసి అతడి గురించి వెల్లడించాడు. దాదాను పొగడ్తలతో ముంచెత్తాడు.
"నేను ఆడే రోజుల్లో ఏ జట్టు మీదైనా పోటీపడేందుకు సిద్ధంగా ఉండేవాడిని. ఎందుకంటే నాకు ప్రత్యర్థులపై ఆధిపత్యం చెలాయించాలంటే ఇష్టం. అలాగే నేను ఎదుర్కొన్న అత్యంత కఠినమైన ప్రత్యర్థుల్లో సౌరభ్ గంగూలీ ఒకరు. అతను బలమైన ప్రత్యర్థే కాదు గొప్ప కెప్టెన్ కూడా. అతని నాయకత్వంలో నేను ఐపీఎల్‌లో కోల్‌కతా నైట్‌ రైడర్స్‌ తరఫున ఆడాను."
-షోయబ్ అక్తర్, పాక్ మాజీ పేసర్
కేవలం ఐపీఎల్‌ ఆరంభ సీజన్‌లోనే ఆడిన ఈ పాక్ పేసర్ కోల్‌కతా తరఫున మూడు మ్యాచ్‌ల్లో పాల్గొని 5 వికెట్లు పడగొట్టాడు. తర్వాత ఇక ఐపీఎల్‌లో పాల్గొనలేదు.
