యూఏఈ వేదికగా జరిగే ఐపీఎల్కు తనను వ్యాఖ్యాతగా తీసుకెళ్లమని భారత మాజీ బ్యాట్స్మన్ సంజయ్ మంజ్రేకర్ బీసీసీఐని కోరాడు. ఈ మేరకు బోర్డుకు మెయిల్ చేశాడు. ఈ ఏడాది మార్చిలో భారత్- దక్షిణాఫ్రికా వన్డే సిరీస్కు ముందు మంజ్రేకర్ను బోర్డు కామెంటరీ ప్యానెల్ నుంచి తొలగించింది బీసీసీఐ. అయితే, ఈ సిరీస్ను కరోనా కారణంగా రద్దు చేశారు.
"అపెక్స్ కౌన్సిల్ గౌరవనీయ సభ్యులకు నమస్కారం. మీరంతా బాగున్నారని ఆశిస్తున్నా. వ్యాఖ్యాతగా నా స్థానంపై ఇప్పటికే నేను పంపిన మెయిల్ను మీరు స్వీకరించారు. ఐపీఎల్ తేదీలు ప్రకటించిన నేపథ్యంలో బీసీసీఐ కామెంటరీ ప్యానెల్ను ఎన్నుకుంటుంది. మీరు నిర్దేశించిన మార్గదర్శకాల ప్రకారం పని చేయడానికి సిద్ధంగా ఉన్నా. ధన్యవాదాలు."
-సంజయ్ మంజ్రేకర్, వ్యాఖ్యాత
గతేడాది ప్రపంచకప్లో ఆల్రౌండర్ జడేజాపై మంజ్రేకర్ అనుచిత వ్యాఖ్యలు చేసినందుకు టీమ్ఇండియాలోని కొంతమంది ఆటగాళ్లు బీసీసీఐకి ఫిర్యాదు చేశారు. ఈ క్రమంలోనే కామెంటరీ ప్యానెల్ నుంచి బోర్డు అతన్ని తొలగించింది. ఈ విషయంపై బీసీసీఐ అధికారి ఒకరు స్పందిస్తూ.. "ఈ అధ్యాయాన్ని ఇంతటితో ముగిస్తూ.. మంజ్రేకర్ను క్షమించాలి. జడేజాపై చేసిన వ్యాఖ్యలకు అతను ఇప్పటికే క్షమాపణలు చెప్పాడు. అంతే కాకుండా టీవీ వ్యాఖ్యాతల ప్రవర్తనా నియమావళికి కట్టుబడి ఉంటానని హామీ ఇచ్చాడు. అన్నింటికంటే అతను చాలా చక్కటి వ్యాఖ్యాత" అని తెలిపాడు.
