సచిన్ తెందూల్కర్.. ఈ పేరు వింటే సగటు క్రికెట్ అభిమాని రక్తం ఉప్పొంగుతుంది.. ప్రేక్షకుల గుండెల్లో అతడి ఆటతో సుస్థిర స్థానం ఏర్పరచుకున్న మాస్టర్ రిటైరై ఆరేళ్లు అయింది. ఈ సందర్భంగా క్రికెట్ దేవుడి లైబ్రరీని రూపొందించారు కేరళ కాలికట్లోని 'మలబార్ క్రిస్టియన్ కళాశాల' చరిత్ర విభాగాధిపతి వశిష్ట్.
జాతీయ సమగ్రత పెంపొందించడం కోసం క్రికెట్ను ఓ సందేశంలా ప్రచారం చేసేందుకే ఈ లైబ్రరీని ఏర్పాటు చేసినట్లు ఆయన తెలిపారు.
"మాస్టర్.. రిటైరై ఆరేళ్లు పూర్తయిన సందర్భంగా సచిన్ లైబ్రరీని మలబార్ క్రిస్టియన్ కళాశాలలో ఏర్పాటు చేశాం. తన ఆటతో .. దేశాన్ని ఐక్యం చేశాడు. కులం, మతం, భాష, ప్రాంతాల సరిహద్దులను చెరిపేసి అందరి మన్ననలు పొందాడు." -వశిస్ట్, మలబార్ కళాశాల చరిత్ర విభాగాధిపతి
సచిన్కు సంబంధించిన 60 పుస్తకాలను ఈ లైబ్రరీలో ఉంచారు. 11 భాషల్లో వీటిని ప్రచురించారు. మలయాళం, తమిళం, తెలుగు, కన్నడ, ఒడియా, బెంగాలీ, గుజరాతీ, మరాఠీ, అసోం, హిందీ, ఇంగ్లీష్ భాషల్లో ఇవి లభ్యమవుతాయి.
2013 నవంబరు 16న అంతర్జాతీయ క్రికెట్కు సచిన్ వీడ్కోలు పలికాడు. టెస్టుల్లో పాకిస్థాన్పై అరంగేట్రం చేసిన మాస్టర్.. చివరి మ్యాచ్ వెస్టిండీస్పై ఆడాడు. వాంఖడే స్టేడియంలో (ముంబయి) వెస్టిండీస్తో జరిగిన ఈ మ్యాచ్లో 74 పరుగులు చేసి ఆకట్టుకున్నాడు.
మొత్తంగా 200 టెస్టులు ఆడిన సచిన్.. 53.78 సగటుతో 15,921 పరుగులు చేశాడు. ఇందులో 51 సెంచరీలు, 68 అర్ధ శతకాలు ఉన్నాయి. టెస్టుల్లో మాస్టర్.. వ్యక్తిగత అత్యధిక స్కోరు 248 నాటౌట్‌. బౌలర్గానూ రాణించి 46 వికెట్లు తీశాడు. ఈ ఫార్మాట్లో అత్యధిక పరుగులు సాధించిన క్రికెటర్గానూ రికార్డు నెలకొల్పాడు.
ఇదీ చదవండి: ఆటగాళ్లను వదులుకున్న ఐపీఎల్ ఫ్రాంచైజీలు
