స్టార్ ఫుట్బాలర్ క్రిస్టియానో రొనాల్డో తనకు స్ఫూర్తినిచ్చాడని చెప్పాడు టీమిండియా కెప్టెన్ విరాట్ కోహ్లీ. అతడి గురించి మరిన్ని విషయాలు పంచుకున్నాడు.
" నాకు క్రిస్టియానో రొనాల్డో స్ఫూర్తి. పని పట్ల నిబద్ధతను అతడు ఆడే ప్రతీ మ్యాచ్లోనూ చూపిస్తాడు. దాన్ని అందుకోవలంటే కష్టం. రొనాల్డో ఆడే ప్రతీ క్లబ్ను నేను అభిమానిస్తా." -విరాట్ కోహ్లీ, టీమిండియా కెప్టెన్
క్రిస్టియానో రొనాల్డో
అదే విధంగా మెస్సీ-రొనాల్డోలలో ఎవరు గొప్ప అనే ప్రశ్నకు తనదైన శైలిలో సమాధానమిచ్చాడు విరాట్.
"ఎక్కువగా సవాళ్లను స్వీకరించి విజయవంతమైన వారిలో అందరి కంటే రొనాల్డో ముందున్నాడనేది నా అభిప్రాయం. నేను చూసిన వారిలో అతడో సంపూర్ణ ఆటగాడు.దీనికి తోడు అద్భుతమైన సారథి కాబట్టి అతడంటే నాకు అమితమైన ఇష్టం." -విరాట్ కోహ్లీ, టీమిండియా కెప్టెన్
వీరిద్దరే కాకుండా జర్మన్ గోల్ కీపర్ ఒలివర్ కాన్, క్రోయేషియా కెప్టెన్ లుకా మొద్రిక్, స్పానిష్ ద్వయం ఆండ్రెస్ ఇనైస్టా, క్జావీల ఆటను చూస్తూ పెరిగానని చెప్పాడు విరాట్ కోహ్లీ. అదే విధంగా 1998, 2002 ఫుట్బాల్ ప్రపంచకప్లు చూడటం తన జీవితంలో మర్చిపోలేని అనుభవాలని అన్నాడు.
ప్రస్తుత భారత ఫుట్బాల్ టీమ్కు నాయకత్వం వహిస్తున్న సునీల్ ఛెత్రిపై ప్రశంసలు కురిపించాడు విరాట్.
"గత నాలుగైదేళ్లలో మన ఫుట్బాల్ జట్టు బాగా మెరుగుపడింది. కొత్త ఆటగాళ్ల రాకతో పటిష్ఠంగా తయారవుతోంది. ముందుండి నడిపిస్తున్న ఛెత్రి.. కుర్రాళ్లకు స్ఫూర్తిగా నిలుస్తున్నాడు. ఫుట్బాల్ ప్రపంచకప్ ఆడేందుకు అన్ని అర్హతలు సునీల్ ఛెత్రికి ఉన్నాయి. అతడో నిజమైన ఛాంపియన్." -విరాట్ కోహ్లీ, టీమిండియా కెప్టెన్
ప్రస్తుతం వెస్టిండీస్ పర్యటనలో ఉన్న విరాట్ సేన.. శనివారం తొలి టీట్వంటీ ఆడనుంది. ఇప్పటికే మ్యాచ్కు ఆతిథ్యమిస్తున్న ఫ్లోరిడాకు చేరుకుంది. వీటితో పాటు వన్డే,టెస్టు సిరీస్లు ఆడనుంది టీమిండియా.
ఇది చదవండి: రోహిత్శర్మను ఊరిస్తున్న మరో రికార్డు
