బంగ్లాదేశ్తో టీ20 సిరీస్ గెలవడంపై భారత క్రికెటర్ శ్రేయస్ అయ్యర్ స్పందించాడు. కెప్టెన్ రోహిత్ శర్మ తమలో ఆత్మవిశ్వాసం నింపాడని అన్నాడు. మ్యాచ్ మధ్యలో తమకు దిశానిర్దేశం చేస్తూ, వ్యూహాలను ప్రణాళిక బద్దంగా రచించాడని చెప్పాడు.
"మ్యాచ్ మధ్యలో మేం ఒత్తిడికి లోనయ్యాం. ఈ ఫార్మాట్లో ఏ జట్టునూ తక్కువ అంచనా వేయడానికి వీల్లేదు. గత రెండు మ్యాచ్ల్లోనూ వారు(బంగ్లాదేశ్) అద్భుతంగా ఆడారు. అయితే ఈ మ్యాచ్లో మాకు మంచి ఆరంభం దక్కింది. అయితే ఛేదనలో బంగ్లా బ్యాట్స్మెన్ పుంజుకోవడం మొదలు పెట్టారు. ఆ సమయంలో రోహిత్ శర్మ మాలో ఆత్మవిశ్వాసం నింపాడు" -శ్రేయస్ అయ్యర్, టీమిండియా క్రికెటర్.
జట్టు క్లిష్ట పరిస్థితుల్లో ఉన్నప్పుడు సరైన సమయంలో కీలక ఇన్నింగ్స్ ఆడానని చెప్పాడు అయ్యర్.
"సరైన సమయంలోనే బ్యాట్ ఝుళిపించానని అనుకుంటున్నా. ఒకే ఓవర్లో మూడు సిక్సర్లు కొట్టడం మా జట్టుకు కలిసొచ్చింది. లేకుంటే 150 లోపు స్కోరుకే పరిమితమయ్యే వాళ్లం. జట్టు విజయంలో నా పాత్ర ఉందని భావిస్తున్నా. 15వ ఓవర్ వరకు టాప్-3 బ్యాట్స్మెన్ ఒకరు క్రీజులో ఉండడం చాలా ముఖ్యం" - శ్రేయస్ అయ్యర్, టీమిండియా క్రికెటర్.
భారత బౌలర్లు చాహర్, దూబే.. మ్యాచ్ను మలుపుతిప్పారని అన్నాడు బ్యాట్స్మన్ శ్రేయస్ అయ్యర్.
"ఈ మ్యాచ్లో రెండు మలుపులు ఉన్నాయి. మొదట దీపక్ చాహర్.. ఆరంభంలోనే రెండు వికెట్లు తీసి బంగ్లాదేశ్ను దెబ్బతీశాడు. అనంతరం శివమ్ దూబే.. ఒకే ఓవర్లో ఇద్దరిని పెవిలియన్ చేర్చి మ్యాచ్ను మా వైపు తిప్పాడు" - శ్రేయస్ అయ్యర్, టీమిండియా క్రికెటర్.
ఆదివారం జరిగిన ఈ మ్యాచ్లో భారత్ 30 పరుగుల తేడాతో భారత్ విజయం సాధించింది. సిరీస్ను 2-1 తేడాతో కైవసం చేసుకుంది. దీపక్ చాహర్ హ్యాట్రిక్ సహా 6 వికెట్లతో విజృంభించాడు.
టీమిండియాలో శ్రేయస్ అయ్యర్(62), కేఎల్ రాహుల్(52) అర్ధశతకాలు చేసి జట్టుకు గౌరవప్రదమైన స్కోరు అందించడంలో కీలక పాత్ర పోషించారు.
ఇదీ చదవండి: దీపక్ చాహర్ హ్యాట్రిక్.. ర్యాంక్ 88 స్థానాలు పైకి
