టీమ్ఇండియా టెస్టు స్పెషలిస్ట్ చెతేశ్వర్ పుజారా అంతర్జాతీయ క్రికెట్లో అడుగుపెట్టి నేటితో పదేళ్లు పూర్తయ్యింది. టెస్టు ఫార్మాట్లో జాతీయ జట్టు విశ్వసనీయ బ్యాట్స్మన్గా ఎదగడానికి సహకరించిన వారికి, అతని అభిమానులకు ఈ సందర్భంగా కృతజ్ఞతలు తెలిపాడు.
"భారత జట్టు తరపున అంతర్జాతీయ క్రికెట్లో అడుగుపెట్టి పదేళ్లు పూర్తి చేసుకోవడం విశేషంగా, నాకు దక్కిన ఆశీర్వాదంగా భావిస్తున్నా. నా తండ్రి కళ్లెదుట రాజ్కోట్లో సాధారణ క్రికెటర్గా నేను ప్రారంభించిన ప్రయాణం నన్ను ఈ స్థాయికి తెస్తుందని ఊహించలేదు. ఇన్నాళ్లు నాకు మద్దతుగా ఉన్నవారికి, నా అభిమానులకు ధన్యవాదాలు. మీరంతా నాకు మరింత సహకారాన్ని అందిస్తారని ఎదురుచూస్తున్నా."
- చెతేశ్వర్ పుజారా, టీమ్ఇండియా క్రికెటర్
ఈ తేదీని గుర్తుంచుకోవడానికి మరొక కారణాన్ని తెలియజేస్తూ ఓ నోట్ ద్వారా తెలిపాడు పుజారా. "ఆశ్చర్యం ఏమిటంటే ఈ రోజు నా భార్య పుట్టినరోజు. కాబట్టి ఈ రోజును నేనెప్పటికీ మర్చిపోలేను" అని పేర్కొన్నాడు.
బెంగళూరు వేదికగా ఆస్ట్రేలియాతో జరిగిన టెస్టు ద్వారా అంతర్జాతీయ క్రికెట్లో అరంగేట్రం చేశాడు పుజారా. ఈ మ్యాచ్ రెండో ఇన్నింగ్స్లో 72 పరుగులు చేసి అందరి దృష్టినీ ఆకర్షించాడు. 2018లో జరిగిన ఆస్ట్రేలియా పర్యటనలో 500 వ్యక్తిగత పరుగులు చేసి మూడు టెస్టుల సిరీస్లో భారత్(2-1) గెలుపునకు సహకరించాడు. అంతర్జాతీయ టెస్టు క్రికెట్లో ఇప్పటివరకు 77 మ్యాచ్లు ఆడిన పుజారా.. 18 సెంచరీలతో 5,840 పరుగులు సాధించాడు.
