విజయ్ హజారే ట్రోఫీ సెమీఫైనల్స్లో ముంబయి జట్టు అడుగుపెట్టింది. మంగళవారం సౌరాష్ట్రతో జరిగిన క్వార్టర్స్లో ముంబయి 9 వికెట్ల తేడాతో గెలుపొంది టోర్నీ సెమీస్కు చేరింది. కెప్టెన్ పృథ్వీషా(185) అజేయ శతకంతో జట్టును విజయాన్ని అందించడంలో కీలకపాత్ర పోషించారు.
తొలుత బ్యాటింగ్ చేసిన సౌరాష్ట్ర జట్టు నిర్ణీత 50 ఓవర్లలో 5 వికెట్లు కోల్పోయి 284 పరుగులు చేసింది. ఛేదనలో ముంబయి జట్టు ఓపెనర్లు నిలకడగా బ్యాటింగ్ చేసి మొదటి వికెట్కు 238 రన్స్ భాగస్వామ్యాన్ని నెలకొల్పారు. కెప్టెన్ పృథ్వీషా 185 పరుగులు చేయగా.. అందులో 21 ఫోర్లు, 7 సిక్సర్లు ఉన్నాయి. యశస్వీ జైశ్వాల్ 75 పరుగులు చేసి ఉనద్కట్ బౌలింగ్లో వెనుదిరిగాడు.
కీలక ఆటగాళ్లు దూరమైనా..
అయితే ఇంగ్లాండ్తో పరిమిత ఓవర్ల సిరీస్కు ఎంపికైన కారణంగా ముంబయి కెప్టెన్ శ్రేయస్ అయ్యర్, బ్యాట్స్మన్ సూర్యకుమార్ యూదవ్ దూరమయ్యారు. ఈ నేపథ్యంలో ముంబయి పగ్గాలు చేపట్టిన పృథ్వీషా.. జట్టును సెమీస్కు చేర్చాడు.
సెమీస్కు చేరిన జట్లు
గుజరాత్, కర్ణాటక జట్లు ఇప్పటికే సెమీస్కు అర్హత సాధించాయి. గురువారం ఈ టోర్నీ సెమీఫైనల్ మ్యాచ్లు నిర్వహించనుండగా.. ఆదివారం ఫైనల్ జరగనుంది.
ఇరుజట్లు స్కోర్లు: సౌరాష్ట్ర 284/5 (సామర్థ్ వ్యాస్ 90 నాటౌట్; షామ్స్ ములానీ 2-51); ముంబయి 285/1 (పృథ్వీషా 185 నాటౌట్; జయదేవ్ ఉనద్కట్ 1-52)
ఇదీ చూడండి: ఇంగ్లాండ్తో టీ20 సిరీస్ ఆడేందుకు సిద్ధం: హార్దిక్
