సెంట్రల్‌ కాంట్రాక్టు పొందని క్రికెటర్లు విదేశీ లీగుల్లో ఆడేందుకు బీసీసీఐ అనుమతివ్వాలని క్రికెటర్‌ రాబిన్ ఉతప్ప విజ్ఞప్తి చేశాడు. ఒక స్థాయిలో సుదీర్ఘకాలం ఆడి మళ్లీ దేశవాళీకి వెళ్లాలంటే కాస్త సమయం పడుతుందని పేర్కొన్నాడు. మానసికంగా సర్దుబాటు చేసుకోవాల్సి ఉంటుందని వెల్లడించాడు.
"దయచేసి మమ్మల్ని (విదేశీ టీ20 లీగులకు) వెళ్లనివ్వండి. ఎందుకంటే, సుదీర్ఘకాలం ఒక స్థాయిలో క్రికెట్ ఆడి మళ్లీ దేశవాళీకి వెళ్లాలంటే సమయం పడుతుంది. ప్రపంచంలోని ఇతర లీగుల్లో ఆడేందుకు అనుమతించకపోతే ఆటగాళ్లకు బాధేస్తుంది. రెండు, మూడు విదేశీ లీగులు ఆడితే బాగుంటుంది. ఒక క్రికెట్ విద్యార్థిగా నేర్చుకునేందుకు ఇవి ఉపయోగపడతాయి" అని ఉతప్ప అభిప్రాయపడ్డాడు.
ఇర్ఫాన్‌ పఠాన్‌తో మాట్లాడుతూ.. సురేశ్‌ రైనా ఇదే అభిప్రాయం వ్యక్తం చేయడం గమనార్హం. "కాంట్రాక్టు పొందని ఆటగాళ్లు ఇతర లీగుల్లో ఆడేందుకు బీసీసీఐ ఏదో ఒకటి చేయాలి. విదేశీ లీగుల్లో ఆడేందుకు అనుమతించాలి. ఎంతోమంది ఆటగాళ్లు వీటి నుంచి నేర్చుకోగలరు" అని రైనా అన్నాడు.
ఇదీ చూడండి.. గంభీర్, ఎమ్మెస్కే మధ్య సెలక్షన్ లొల్లి
