ఆసీస్ జట్టుతో 'గులాబి టెస్టు' సవాలుగా ఉండబోతోందని చెప్పాడు టీమ్ఇండియా వైస్కెప్టెన్ రోహిత్ శర్మ. ఈ ఏడాది ఆఖరులో ఆస్ట్రేలియాతో నాలుగు మ్యాచ్ల టెస్టు సిరీస్ ప్రారంభం కానుంది. ఈ పర్యటన కోసం ఏ విధంగా సన్నద్ధమవుతున్నారని ఇన్స్టాగ్రామ్లో ఓ అభిమాని అడగిన ప్రశ్నకు రోహిత్ శర్మ సమాధానమిచ్చాడు.
"ఆస్ట్రేలియాతో జరగనున్న పింక్ బాల్ టెస్టుకు మీరు ఏ విధంగా సన్నద్ధమవుతున్నారు. మీ ఆలోచనలేంటి?" అని ఓ నెటిజన్ అడిగాడు. దానికి రోహిత్ సమాధానమిస్తూ.."కచ్చితంగా అది పెద్ద సవాలే" అని అన్నాడు.
ఆస్ట్రేలియా పర్యటనలో భాగంగా డిసెంబరు 3 నుంచి బోర్డర్-గావస్కర్ టెస్టు సిరీస్లో తలపడనుంది భారత జట్టు. అందులో డిసెంబరు 11 నుంచి జరగనున్న రెండో మ్యాచ్.. పింక్బాల్తో నిర్వహించనున్నారు. ఇందుకు అడిలైడ్ వేదిక కానుంది. అయితే విదేశాల్లో భారత్ ఆడుతున్న తొలి గులాబి బంతి టెస్టు ఇదే.
గతేడాది నవంబరులో బంగ్లాదేశ్తో కోల్కతాలో జరిగిన ఏకైక పింక్ బాల్ టెస్టు టీమ్ఇండియా ఆడింది. అందులో భారత జట్టు ఘనవిజయం సాధించింది.
ఓటమి లేని జట్టు..
ఇప్పటివరకు డై-నైట్ టెస్టుల్లో ఆస్ట్రేలియా ఒక్క మ్యాచ్ కూడా ఓడిపోలేదు. ఆడిన ఏడు మ్యాచ్ల్లో ఆసీస్ వరుస విజయాలను నమోదు చేసింది. వీటిలో బౌలర్ మిచెల్ స్టార్క్.. 42 వికెట్లను పడగొట్టాడు.
బోర్డర్-గావస్కర్ టెస్టు సిరీస్లోని తొలి మ్యాచ్ డిసెంబరు 3 నుంచి గబ్బా వేదికగా జరగనుంది. ఆ తర్వాత డిసెంబరు 11 నుంచి 15 వరకు అడిలైడ్లో పింక్బాల్ టెస్టు.. మెల్బోర్న్లో బాక్సింగ్ డే టెస్టు.. సిడ్నీలో న్యూఇయర్ టెస్టు జరగనున్నాయి.
ఇదీ చూడండి... ప్రపంచకప్ తర్వాతే రిటైర్మెంట్: హఫీజ్
