కరోనా కారణంగా ఆర్థిక భారాన్ని మోస్తున్న పాకిస్థాన్ క్రికెట్ బోర్డు (పీసీబీ) ఇంగ్లాండ్తో జరిగే సిరీస్ కోసం స్పాన్సర్ను వెతకడంలో విఫలమైంది. పాక్ జట్టు లోగో స్పాన్సర్షిప్ ఒప్పందంపై సంతకం చేయడానికి ఓ పానీయ సంస్థతో చర్చలు కొనసాగుతున్నాయని ఓ పీసీబీ అధికారి తెలిపాడు. సదరు సంస్థ విశ్లేషకుల అంచనాల కంటే చాలా తక్కువ మొత్తానికి టెండర్ వేసిందని తెలుస్తోంది.
"పానీయాల సంస్థతో పాకిస్థాన్ క్రికెట్ బోర్డు ఒప్పందం ఇటీవలే ముగిసింది. పాకిస్థాన్ జాతీయ జట్టుకు సంబంధించిన ప్రధాన లోగో స్పాన్సర్షిప్ ఒప్పందం కోసం తాజాగా వేలానికి ఆహ్వానించాం. కానీ, ఆ పానీయ సంస్థ తప్ప ఎవరూ వేలంలో పాల్గొనలేదు. ఇది మా ముందున్న సమస్య. కానీ, చర్చలు ఇంకా కొనసాగుతున్నాయి. కరోనా వ్యాప్తి కారణంగా బహుళజాతి కంపెనీలూ తీవ్రంగా నష్టపోయాయని అర్థమవుతుంద"ని పీసీబీ అధికారి వెల్లడించాడు.
బ్రాడ్కాస్ట్ ఒప్పందం
పాక్ జట్టు స్పాన్సర్షిప్ కోసం పానీయ సంస్థ ఆ దేశ క్రికెట్ బోర్డుకు గతంలో చెల్లించిన మొత్తంలో 35 శాతం నుంచి 40 శాతమే టెండర్ వేసినట్లు తెలుస్తోంది. పాకిస్థాన్ క్రికెట్ మ్యాచ్ల ప్రసారదారు టెన్స్పోర్ట్స్తో కుదుర్చుకున్న నాలుగేళ్ల ఒప్పందం కూడా ఇటీవలే ముగిసింది. పాక్లో అంతర్జాతీయ హోమ్ సిరీస్ హక్కులను కొనుగోలు చేయడానికి కొత్త బ్రాడ్కాస్టర్ను వెతకడంలోనూ బోర్డు సమస్యలను ఎదుర్కుటోంది.
అలా అయితే కష్టమే!
ఇంగ్లాండ్తో సిరీస్ ప్రారంభానికి ముందే తమకు స్పాన్సర్ లభిస్తారని పీసీబీ ఆశాజనకంగా ఎదురుచూస్తోంది. కొత్త స్పాన్సర్ను రాకపోతే ఆటగాళ్ల వార్షిక వేతనంలో సుమారు 75 శాతం కోత ఉండొచ్చు.
ఇదీ చూడండి... 'కోహ్లీపై విరుద్ధ ప్రయోజనాల ఆరోపణల్లో నిజం లేదు'
