టీమిండియా మాజీ కెప్టెన్‌ మహేంద్ర సింగ్ ధోనీ వారసుడిగా పేరు తెచ్చుకున్న యువ వికెట్కీపర్ రిషభ్ పంత్ పేలవమైన ఆటతీరుతో విమర్శలు ఎదుర్కొంటున్నాడు. తాజాగా అతడికి పలు సూచనలు ఇచ్చాడు వైస్‌ కెప్టెన్‌ అజింక్య రహానె. ప్రస్తుతం పంత్.. గడ్డు కాలాన్ని ఎదుర్కొంటున్నాడని, ఈ విషయాన్ని అతడు అంగీకరించి భవిష్యత్తుపై దృష్టి పెట్టాలని అన్నాడు.
"ప్రస్తుతం నీవు ఎదుర్కొంటున్న పరిస్థితిని అంగీకరించాలి. ఇది నీకు చాలా ముఖ్యం. సానుకూల దృక్పథంతో ముందుకుసాగుతూ మిగతా ఆటగాళ్ల నుంచి వీలైనన్ని విషయాలను నేర్చుకోవాలి"
-అజింక్య రహానె, వైస్‌ కెప్టెన్‌.
ఆటపై మరింత శ్రద్ధ, శ్రమ పెట్టి ఓ పరిణతి చెందిన క్రికెటర్గా ఎదగాలని పంత్కు సూచించాడు రహానె. వచ్చిన ప్రతి అవకాశాన్ని సద్వినియోగం చేసుకోవాలని చెప్పాడు.
ఐదు నెలల క్రితం వరకు పంత్కు విరివిగా అవకాశాలు వచ్చినా వాటిని సద్వినియోగం చేసుకోలేకపోయాడు. సరైన ప్రదర్శన చేయకుండా నిరాశపర్చాడు. అందుకే అతడి స్థానంలో పరిమిత ఓవర్లలో వికెట్ కీపర్గా రాహుల్, టెస్టుల్లో వృద్ధిమాన్‌ సాహాకు అవకాశం ఇచ్చింది యాజమాన్యం.
ఇదీ చూడండి : పాక్ క్రికెటర్ తప్పుడు ట్వీట్.. ట్రోల్ చేసిన నెటిజన్లు
