2023లో పాకిస్థాన్లో జరగబోయే ఆసియా కప్లో భారత్కు ఆతిథ్యమిస్తామని ఆశాభావం వ్యక్తంచేశారు ఆ దేశ క్రికెట్ బోర్డు(పీసీబీ) ఛైర్మన్ ఎహ్సాన్ మణి. అప్పటికల్లా ఇరు దేశాల మధ్య రాజకీయ సంబంధాలు మెరుగవుతాయని నమ్ముతున్నట్లు చెప్పారు.
"2022లో ఆసియా కప్ను శ్రీలంక నిర్వహిస్తుంది. 2023లో పాకిస్థాన్ ఆతిథ్యమిస్తుంది. అప్పటిలోగా భారత్-పాక్ మధ్య రాజకీయ సంబంధాలు మెరుగై, టీమ్ఇండియా పాకిస్థాన్ రావడానికి మార్గం సుగమం అవుతుందని ఆశిస్తున్నా."
-ఎహ్సాన్ మణి, పాకిస్థాన్ క్రికెట్ బోర్డు ఛైర్మన్
భారత్ తమ దేశానికి వస్తే పాకిస్థాన్ క్రికెట్కు చాలా మేలు జరుగుతుందని మణి అభిప్రాయపడ్డారు. అయితే ఈ ఏడాది జూన్లో జరగాల్సిన ఆసియా కప్ 2021 జరిగే పరిస్థితి లేదని అన్నారు. పీఎస్ఎల్తో పాకిస్థాన్ బిజీగా ఉంటే.. జూన్లో ఇంగ్లాండ్లో న్యూజిలాండ్తో జరగబోయే ఐసీసీ టెస్టు ఛాంపియన్షిప్ ఫైనల్లో భారత్ తలపడనుందని చెప్పారు. ఇక ఈ ఏడాది భారత్లో జరిగే టీ20 ప్రపంచకప్లో పాక్ పాల్గొనడంపై ఐసీసీ భరోసా ఇచ్చిందని మణి తెలిపారు.
ఇదీ చూడండి: డబ్ల్యూటీసీలో భారత్ ఫైనల్ చేరితే ఆసియా కప్ వాయిదా!
ఇదీ చూడండి: ఆసియా కప్ ఆతిథ్యం వదులుకుంటాం: పీసీబీ
ఇదీ చూడండి: 'మా మనుగడకు భారత్ సాయం అవసరం లేదు'
