భారత క్రికెట్ నియంత్రణ మండలి (బీసీసీఐ)పై పాకిస్థాన్ క్రికెట్ బోర్డు మరోసారి విషం కక్కింది. ఐపీఎల్ నిర్వహణ కారణంగా ఆసియా కప్ను వాయిదా వేయడానికి పూర్తి వ్యతిరేకమని తాజా ప్రకటన ద్వారా తెలియజేసింది. భారత్లో కరోనా లాక్డౌన్ కారణంగా ఐపీఎల్ నిరవధికంగా వాయిదా పడింది. ఈ నేపథ్యంలో సెప్టెంబర్-అక్టోబర్లో ఐపీఎల్ నిర్వహించాలనే పరిశీలన జరుగుతుందని పాక్ పేర్కొంది. అయితే దీనికి సంబంధించి అంతర్జాతీయ టోర్నీల్లో ఎలాంటి మార్పు జరిగినా అంగీకరించమని ఆ దేశ బోర్డు తాజాగా వెల్లడించింది.
"మా వైఖరి చాలా స్పష్టంగా ఉంది. ఆసియాకప్ను సెప్టెంబరులో నిర్వహించాలని ఐసీసీ ప్రణాళిక చేసింది. ఈ టోర్నీ పాకిస్థాన్లో జరగాల్సి ఉండగా కొన్ని కారణాల వల్ల దుబాయ్లో జరుగుతుంది. కానీ, ఐపీఎల్ కోసం ఈ టోర్నీని వాయిదా వేయడానికి మేము పూర్తి వ్యతిరేకం. ఐపీఎల్ నిర్వహించడానికి ఆసియాకప్ను నవంబర్-డిసెంబర్కు వాయిదా వేస్తారని మాకు సమాచారం అందుతోంది. అయితే దీన్ని మేము సహించం. ఒక్క దేశం కోసం ఆసియాకప్ ప్రణాళికను మార్చటం దారుణం. దానికి మా సహకారం లభించదు."
--వసీం ఖాన్, పాకిస్థాన్ క్రికెట్ బోర్డు సీఈఓ
ఐపీఎల్ కారణంగా మరే ఇతర ప్రధాన టోర్నీలకు ఆటంకం కలగకుండా ప్రణాళికలు చేస్తున్నారు. ప్రణాళిక ప్రకారం ఆసియాకప్ ముగిసిన తర్వాతే ఐపీఎల్ నిర్వహించనున్నట్లు సమాచారం. అయితే ఐపీఎల్ కోసం ఆసియాకప్ను వాయిదా వేయాలనే ప్రతిపాదన ఇప్పటివరకు రాలేదు. కరోనా లాక్డౌన్ కారణంగా ఈ లీగ్ నిరవధికంగా వాయిదా పడింది. దీంతో ఫ్రాంఛైజీలు తీవ్రంగా నష్టపోతాయని వైరస్ ప్రభావం తగ్గిన వెంటనే టోర్నీ నిర్వహణకు బీసీసీఐ కసరత్తులు చేస్తోంది.
ఇదీ చూడండి.. 'సచిన్.. మరెన్నో తరాలకు మీరు స్ఫూర్తిగా నిలవాలి'
