క్రికెటర్లకు గాయాలు మామూలే. కానీ ఆ గాయాల నుంచి కోలుకుని మళ్లీ జట్టులోకి రావడమే కష్టం. టీమ్ఇండియా పేసర్ భువనేశ్వర్ కుమార్ కూడా ఇటీవల గాయం బారినపడ్డాడు. త్వరగానే కోలుకుని జట్టులోకి వచ్చాడు. ఈ విషయంపై స్పందిస్తూ.. సహ ఆటగాళ్లు, మేనేజ్మెంట్ మద్దతు వల్లే మళ్లీ జట్టులోకి రాగలిగానని చెప్పాడు.
"మనకెప్పుడూ మేనేజ్మెంట్ మద్దతు ఉండాలి. నాకు సహ ఆటగాళ్లు, యాజమాన్యం నుంచి మంచి మద్దతు లభించింది. ఒక బౌలర్గా మూడు ఫార్మాట్లకు ఆడటం చాలా కష్టంతో కూడుకున్నది. అందులో గాయాలూ మనల్ని చాలా ఇబ్బందిపెడతాయి. అలాంటప్పుడు బౌలింగ్ లయ దెబ్బతింటుంది. అదే లయతో మళ్లీ పునరాగమనం చేయడమూ కష్టమే."
-భువనేశ్వర్ కుమార్, టీమ్ఇండియా పేసర్
గాయం కారణంగా కొంతకాలం జట్టుకు దూరంగా ఉన్నాడు భువనేశ్వర్. సర్జరీ తర్వాత కోలుకుని స్వదేశంలో జరగాల్సిన దక్షిణాఫ్రికా సిరీస్కు ఎంపికయ్యాడు. కానీ కరోనా కారణంగా ఆ సిరీస్ రద్దయింది.
