యాషెస్ సిరీస్‌లో భాగంగా లార్డ్స్ వేదికగా జరగనున్న రెండో టెస్టులో ఇంగ్లాండ్, ఆసీస్ ఆటగాళ్లు ఎర్ర టోపీలు ధరించనున్నారు. ఊపిరితిత్తుల కేన్సర్ బాధితుల కోసం విరాళాలు సేకరించేందుకు రూత్ స్ట్రాస్ ఫౌండేషన్తో కలిసి ఈ కార్యక్రమానికి శ్రీకారం చుట్టారు. మ్యాచ్ వీక్షించేందుకు వచ్చిన ప్రేక్షకులూ ఎరుపు రంగు దుస్తుల్లో రావాల్సిందిగా లార్డ్స్ మైదానం నిర్వాహకులు కోరారు.
ఎవరీ రూత్..?
డిసెంబర్ 2018లో ఊపిరితిత్తుల కేన్సర్‌తో ఆండ్రూ స్ట్రాస్ భార్య రూత్ మరణించింది. ఆమె జ్ఞాపకార్థం ఈ ఫౌండేషన్ స్థాపించారు. బుధవారం నుంచి ప్రారంభమయ్యే ఈ మ్యాచ్ ద్వారా వచ్చిన డబ్బులను లంగ్ కేన్సర్ బాధితుల వైద్యం కోసం ఫౌండేషన్‌కు విరాళంగా ఇవ్వనున్నారు. మ్యాచ్ చూసేందుకు వచ్చిన వారికి ఈ మహమ్మారిపై అవగాహన కల్పించనున్నారు.
భారత్ కూడా గతంలో..
ఈ ఏడాది ఆరంభంలో ఆస్ట్రేలియా పర్యటనకు వెళ్లిన టీమిండియా .. ఆసీస్ దిగ్గజం గ్లెన్ మెక్గ్రాత్ ఫౌండేషన్ కోసం విరాళాలు సేకరించేందుకు పింక్ టోపీలను ధరించింది. ప్రపంచకప్లోనూ 'వన్డే ఫర్ చిల్డ్రన్' పేరిట విరాళాల సేకరణకు సహకరించింది.
ఇవీ చూడండి.. భారత్ పర్యటనకు వచ్చే సఫారీ జట్టిదే
